Көкпекті ауданында тұрғын үй мәселесі оңтайлы шешілуде. 21 желтоқсан күні аудан орталығы Көкпекті ауылында тағы 8 жаңа тұрғын үйдің кілттері табысталды.
Тұрғын үйлердің кілттерін табыстау рәсіміне қатысқан аудан әкімі Әділет Нұрсағатұлы жаңа баспана иелерін қоныс тойларымен құттықтап, бұл жарқын бастаманың өңір тұрғындарының өмір сүру сапасын жақсартуға бағытталғанын атап өтті.
Айта кетейік, биыл Көкпекті ауданында мемлекеттік бағдарламалар және меморандум аясында 50 тұрғын үйдің құрылысы аяқталып, халықтың әлеуметтік осал тобына, көпбалалы отбасыларға және баспанаға мұқтаж азаматтарға берілді. Республика күні қарсаңында Көкпекті ауылында 6 пәтердің, Тәуелсіздік күні қарсаңында Үлкенбөкен және Үлгілімалшы ауылдарында 28 жаңа үйдің кілттері иелеріне табысталған болатын. Ауданы 85 шаршы метрді құрайтын жаңа баспаналарда қолайлы өмір сүруге барлық жағдайлар жасалыпты.
— Тұрғын үймен қамту – халықтың өмір сүру сапасын жақсарту бағытындағы маңызды қадам.
Өздеріңіз білетіндей, биыл Көкпекті ауданында тұрғын үй құрылысы қарқынды жүрді. 50 тұрғын үй салынды. Аудан әкімдігі азаматтардың әл-ауқатын арттыруға бағытталған осындай жобаларды алдағы уақытта да жүзеге асыра береді. Барлық қоныс той иелерін құттықтай отырып, құт-береке, отбасылық бақыт тілеймін,- деді аудан әкімі Ә.Қожанбаев.
Жаңа қонысқа ие болған тұрғындар аудан әкімдігіне алғыстарын білдіріп, қариялар баталарын берді.
