Мемлекет басшысы Қасым-Жомарт Тоқаев Қазақстанда үздік шетелдік жоғары оқу орындарының филиалдарын ашуды тапсырды. Бұл бастама отандық университеттердің ғылыми және академиялық әлеуетін нығайтуға, озық әлемдік тәжірибені енгізуге және еліміздің білім беру жүйесін трансформациялауға бағытталған.
Бүгінгі таңда 34 шетелдік жоғары оқу орындарымен келісім-шарт жасалған. Елімізде 23 серіктес университет бар, онда мыңдаған студенттер педагогика, инженерия және жасанды интеллект сияқты 34 мамандық бойынша білім алуда.
Табысты халықаралық ынтымақтастықтың жарқын мысалдарының бірімен Абай облысы әкімінің орынбасары Жасұлан Сәрсебаев бөлісті. 2023 жылдың мамыр айында Семей қаласындағы Шәкәрім атындағы университетте Быдгощ қаласындағы Экономика университетінің (WSG University in Bydgoszcz) филиалын ашу туралы келісімге қол қойылды.
«Бұл филиал студенттерге еуропалық стандарттарға сәйкес ағылшын және орыс тілдерінде білім алуға бірегей мүмкіндік береді. Ұсынылатын бағдарламаларға «Спорт және демалыс менеджері» (орыс тілінде) және «Мехатроника» (ағылшын тілінде) кіреді. Қазір филиалда 44 студент білім алуда. Оқуды аяқтағаннан кейін олар еуропалық үлгідегі дипломға ие болады, бұл оқу үдерісін интернационалдандыруға септігін тигізіп, түлектерімізге жаңа перспективалар ашады», — деп атап өтті Жасұлан Сәрсебаев.
Шәкәрім университетінің халықаралық ынтымақтастығының тағы бір маңызды бағыты – қос дипломдық бағдарламаларды жүзеге асыру. Кюнгдонг университетімен (Оңтүстік Корея) IT және халықаралық бизнес сияқты салалардағы бағдарламалар сәтті жүзеге асырылуда.
«Негізгі мақсаттардың бірі – әрбір студенттің халықаралық деңгейде білім алуына тең мүмкіндіктер беру. Осыған орай университет Қытай, Оңтүстік Корея, АҚШ, Түркия сияқты түрлі елдердің жетекші ғалымдарын үнемі дәріс оқуға шақырады. Сонымен қатар, университетте шетелдік оқытушылар тұрақты жұмыс істейді. Осылайша білім сапасы жақсарып, инновациялық зерттеулер енгізілуде, бұл Шәкәрім университетінің ұстанымын нығайта түседі», — деп қосты әкімнің орынбасары.
Студенттердің дайындығының жоғары деңгейін халықаралық рейтингтер растайды. Осылайша, QS Asia University Rankings 2025 рейтингінде Шәкәрім университеті Азиядағы 984 университет арасында №501–520 орындарға ие болды. Оның үстіне соңғы екі жылда бұл рейтингтегі ЖОО саны 142-ге көбейсе, университет 100 орынға алға жоғарылады.
Университет экологиялық бастамаларды да белсенді дамытуда. Тұрақты дамуды бағалайтын UI Green Metric World University Ranking 2024 рейтингінде Шәкәрім университеті әлемде 662-орынға, ал қазақстандық университеттер арасында 8-ші орынға ие болды.
