Жұмысшы мамандықтары жылы аясында Абай облысында колледж студенттері мен педагогтеріне арналған «Табыс формуласы» шеберлік сынып ұйымдастырылды. Іс-шарада Электротехникалық колледждің түлектері, бүгінде өңіріміздегі ірі кәсіпорындарда жетекші қызметтер атқарып жүрген кәсіби мамандар өз тәжірибелерін бөлісті.
Шараның басты мақсаты – студенттерге кәсіби дамудың маңыздылығын түсіндіріп, табысты мансаптың құпияларын ашу. Спикерлер өз салаларындағы кәсіби талаптарды, мотивацияның рөлін және еңбек жолында кездескен қиындықтарды қалай еңсергендерін айтып, қатысушыларға нақты мысалдар келтірді.
Шеберлік сынып барысында «Абай Аймағы» АҚ филиалының директоры Ринат Елубаев энергетика саласындағы мамандарға қойылатын талаптар туралы баяндады. Ал «ҚТЖ – Жүк тасымалы» ЖШС филиалының қызметкерлермен жұмыс бөлімінің басшысының орынбасары Бекзат Каримханов теміржол мамандарының кәсіби құзыреттері жайлы әңгімелеп берді.
Электротехникалық колледждің ақпараттық технологиялар бойынша директор орынбасары Никита Лобанов өз баяндамасында «Технопарк концепциясы» тақырыбында сөз қозғады. Ол салалар бойынша технопаркті құрудың мүмкіндіктерін, оның білім беру мен өндіріс арасындағы байланысты нығайтудағы рөлін атап өтті. Лобановтың айтуынша, мұндай технопарктер жаңа технологияларды енгізуге және болашақ мамандарды даярлауға мүмкіндік береді.
Шараға 200 студент пен 100-ден астам педагог қатысты. Қатысушылар спикерлерге сұрақтар қойып, олардың студенттік өмірі мен кәсіби жетістіктері туралы қызықты мәліметтер алды. Шеберлік сыныптар интерактивті форматта өтіп, жас мамандарға білім мен кәсіби даму жолындағы бағыт-бағдарын айқындауға зор мүмкіндік берді.
Абай облысы білім басқармасының баспасөз қызметі
