Дөңгелек үстел барысында қатысушылар мектептен бастап әскерге дейінгі қоғамдағы қылмысқа қарсы күрес жөнінде пікір алмасты.
Абай облысы білім басқармасы басшысының орынбасары Әсем Нүскенова мектептерде буллингтің белең алуы назарға алынуы тиіс маңызды фактор екенін атап өтті.
– Өздеріңіз білетіндей, қазіргі әлемде балалар цифрлық технологиялардың кең таралуы, интернетке қолжетімділік жағдайында өсіп, дамуда. Дәл осы жағдайларда буллинг ұғымы пайда болды. Білім беру ұйымдарында буллинг оқушылардың психологиялық жағдайына кері әсер етіп, мектепте қолайсыз ахуал туғызады. Буллингтің алдын алу қауіпсіз және жайлы білім беру ортасын жасауға, қақтығыстарды болдырмауға және барлық қатысушылар арасындағы құрметті қарым-қатынастарды дамытуға ықпал етеді. Бұл процеске мұғалімдер, ата-аналар және оқушылардың өздері маңызды рөл атқарады, олар ашық диалог, толеранттылық тәрбиесі және қолдау бағдарламалары арқылы агрессия деңгейін төмендетіп, эмоционалдық әл-ауқатты арттыра алады. Біздің облыста буллингпен күресу тәсілдеріне терең зерттеу жүргізілуде. Зерттеудің негізгі бағыттарының бірі – мектептегі буллингтің негізгі себептерін зерделеу,- деп атап өтті Әсем Нүкенова.
Сонымен қатар, спикердің айтуынша, ауқымды зерттеудің маңызды бағыттары — буллингті болдырмауға ғана емес, болашақта оны жоюға көмектесетін күрес әдістері мен тұжырымдамалары.
— Әрине, буллингты болдырмаудың жолдарын зерттеумен біздің облыс қана айналысып отырған жоқ, бұл мәселемен бүкіл республика айналысуда. Еліміздің барлық аймақтарында психологиялық көмек көрсету орталықтары ашылды. Мамандар мектептер мен колледждерді буллинг фактілері бойынша ғана емес, суицидтің алдын алу бағыты бойынша да анықтайды, — деп толықтырды Әсем Нүскенова.
Абай облысы бойынша Экономикалық тергеп-тексеру департаментінің аса маңызды істер жөніндегі уәкілі Ернұр Төкенов цифрландырудың дамуымен барлық азаматтар үшін тәуекелдер де өсіп келе жатқанын, сондықтан цифрлық гигиена мен қауіпсіздікке ерекше назар аудару керектігін хабарлады.
— Мемлекеттік құрылымдардың, білім беру мекемелерінің және азаматтардың бірлескен күш-жігері қаржылық қауіпсіздік деңгейін едәуір арттыра алады. Қазіргі әлемде қаржылық операциялар мен цифрлық технологиялар онлайн сатып алу ақысын төлеумен тығыз байланысты. Алайда, цифрландыру мүмкіндіктерімен бірге алаяқтық әрекеттер, кибершабуылдар және азаматтардың қаражатына қол сұғу тәуекелдері де өсуде. Цифрлық кеңістіктегі негізгі қауіптер фишинг, банктік қызметтерді имитациялайтын электрондық пошталар, зиянды бағдарламалар және вирустар. Сондай-ақ, дропперлерден ерекше сақ болу керек – бұл алаяқтарға банк картасының деректемелерін олар арқылы ақша аударымын жасай алатындай етіп беретін адамдар. Сонымен қатар, дроппердің өзі алаяқтық схеманың бір бөлігі болғанын білмейді, — деп атап өтті Ернұр Төкенов.
Абай облысының ПД жергілікті полиция қызметінің бастығы Әсет Өтепов «Заң және тәртіп» тұжырымдамасын қолдауда және орындауда тәртіп сақшылары маңызды рөл атқаратынын атап өтті.
— Абай облысының полиция департаментінің қызметі «Заң және тәртіп» тұжырымдамасына сәйкес ұйымдастырылған. Статистикалық сауалнамаға сәйкес, сауалнамаға қатысқан азаматтардың 97,2% — ы көшеде өздерін қауіпсіз сезінеді. Қаңтар айының қорытындысы бойынша қоғамдық орындарда жасалған қылмыстар саны 4,7% – ға, көшелерде-25% — ға төмендеді. Мәселен, полиция қызметкерлері қоғамдық орындарда 313 құқық бұзушылық пен 48 ұсақ бұзақылық фактілерінің жолын кесті. Мас күйінде жасалған қылмыстардың алдын алу жұмыстары күшейтілді, — деп атап өтті Әсет Өтепов.
Сонымен қатар, дөңгелек үстел барысында Абай облысы этномедиация кеңесінің төрағасы Қуаныш Молдақашев, қорғаныс департаментінің, әскери полиция гарнизонының өкілдері, сондай-ақ Respublica партиясының Абай облысы бойынша филиалының төрағасы Алмас Айтмұқаш баяндама жасады.
Кездесуге қатысушылар «Заң және тәртіп» тұжырымдамасын қолдауға қатысты пікірлерімен бөлісті, сондай-ақ тұжырымдаманы одан әрі дамыту мүмкіндіктерін талқылады.
