8 наурыз – Халықаралық әйелдер күні қарсаңында және тәжік-ауған шекарасында ерлікпен қаза тапқан Батыр Раджан Батырхановтың анасы Қизат Жылқыбаққызының туған күніне орай ҚР ҰҚК Шекара қызметі Абай облысы бойынша департаментінің әскери қызметшілері мен “Застава тарландары” РҚАБ Абай облысы филиалының төрағасы, запастағы подполковник Еркешов А. арнайы құттықтау ұйымдастырды.
Қизат Жылқыбаққызының денсаулығына байланысты іс-шараға қатыса алмауына орай, шекарашылар оны үйіне барып құттықтады. Бұл шараға республикалық “Еуразия” телеарнасы да қатысып, арнайы сұхбат жүргізді.
Кездесу барысында ҚР ҰҚК Шекара қызметінің директоры, генерал-майор Алжажұманов Е.Е. атынан құттықтау хат табысталды. Сонымен қатар, “Застава тарландары” Республикалық қоғамдық ардагерлер бірлестігінің төрағасы, отставкадағы генерал-майор Сабидолдановтың атынан “Аяулы ана” медалі мен құттықтау хаты табыс етілді.
Бұл – шекара қызметінің батырларды ұмытпай, олардың отбасына құрмет көрсетіп, әрдайым қолдау білдіретінінің жарқын көрінісі. Раджан Батырхановтың ерлігі – ел жадында мәңгі сақталатын тарих. Оның есімі шекарашылардың жүрегінде, ал анасына деген құрмет – әр жауынгердің парызы.
Шекара қызметінің мұндай игі дәстүрі жас сарбаздарға патриоттық тәрбие беріп, ел қорғау жолындағы жауапкершілікті сезінуге үлкен үлес қосатыны сөзсіз.
