Қазақстан Республикасының Мемлекеттік шекарасын бүкіл халық қорғайды
Абай облысының аумағындағы қалыптасып отырған жағдайға жүргізілген талдау заңсыз көші-қонның тұрақты арналарының жоқтығын көрсеткенімен, олардың пайда болу ықтималдығы жоғары екенін айғақтайды.
2024 жылы мемлекеттік шекараның бұзылу фактілері шекара кеңістігінде заңсыз әрекеттерді анықтау мен жолын кесу бойынша пәрменді шаралар қабылдаудың қажеттілігін дәлелдейді. Өткен жылы Қазақстан Республикасының Мемлекеттік шекарасын және шекаралық кеңістікте белгіленген режимдерді бұзғаны үшін ҰҚК Шекара қызметінің лауазымды тұлғалары 444 адамды жауапкершілікке тартты.
Әдетте, заңсыз мигранттар белгіленген тәртіппен тіркелмейді, олардың мәлімдеген мақсаттары шындыққа сәйкес келмейді. Осыған байланысты олар республика аумағында, соның ішінде біздің өңірде бақылаусыз қалады. Бұл шетелдік мигранттардың облыс аумағында тұрақтап қалу қаупін тудырып, өңірдің экономикалық, әлеуметтік және қылмыстық ахуалына кері әсер етуі мүмкін.
Ерекше алаңдаушылық тудыратын жайт – Орталық Африка Республикасы (ОАР) мен Оңтүстік-Шығыс Азия (ОША) елдерінің азаматтарының Абай облысы арқылы Ресей Федерациясына транзиттік ағымының артуы. Шетелдіктер Семей қаласына елдің оңтүстік және орталық өңірлерінен келіп, қонақүйлер мен хостелдерге орналаса отырып, туристер кейпінде әрі қарай Ресейге бағыт алады. Олардың түпкі мақсаты – заңсыз жолдар арқылы Ресей мен Еуропа елдерінде тұрақтап қалу.
Ресей тарапының көші-қон заңнамасына бүгінгі күнге дейін енгізіп жатқан өзгерістері қатайту бағытына ие болып отыр, бұл мигранттарды шекараны заңсыз кесіп өтудің жаңа жолдарын іздеуге итермелеуде.
Сонымен қатар, Шекара қызметі Бородулиха және Бесқарағай бағыттарында шекара бұзушыларды анықтауға арналған оқу-жаттығу эксперименттерін өткізуде. Бұл шаралардың нәтижелері шекара маңындағы жергілікті халықтың құқықтық санасының жеткіліксіз деңгейде екенін көрсетеді. Кейбір жағдайларда тұрғындар ақшаға заңсыз шекара кесіп өтуге жәрдемдесіп (жеткізіп салу, шекараға дейін алып бару), құқық бұзушылыққа қатысуда.
Осыған байланысты облыс азаматтарын, әсіресе шекара маңы аудандарының тұрғындарын қырағылық танытып, өңірдің шекаралық қауіпсіздігін қамтамасыз етуге жан-жақты жәрдемдесуге шақырамыз.
Шекара кеңістігінде орын алып жатқан құқыққа қайшы әрекеттер немесе күдікті тұлғалар туралы мына телефон нөмірлеріне хабарлауды сұраймыз:
8 (7222) 304-072, 8 (7222) 691-007.
