Абай облысында ұлттық спортты дәріптеу мақсатында ҚР ҰҚК Шекара қызметі Абай облысы бойынша департаменті ұйымдастырған қазақ күресінен ашық чемпионат жоғары деңгейде өтті. Спорттық шара Абай облысы бойынша департаменттің бастамасымен өткізіліп, оған өңірдегі шекара бөлімшелерінен жиналған үздік палуандар қатысты.
Чемпионаттың басты мақсаты — шекара қызметкерлері арасында салауатты өмір салтын насихаттау, ұлттық спорт түрлерін дамыту, сондай-ақ достық пен ынтымақтастықты арттыру болды. Қазақ күресі — бабалардан мұра болған рухты спорт түрі. Бұл додада палуандар тек күш-жігерін ғана емес, шеберлігі мен төзімділігін де сынға салды.
Тартысты өткен белдесулер көрермендерге ерекше әсер қалдырды. Жеңімпаздар мен жүлдегерлер арнайы дипломдармен, медальдармен және бағалы сыйлықтармен марапатталды.
Іс-шара соңында ұйымдастырушылар ұлттық спортты қолдау әрі дамыту бағытында мұндай жарыстар алдағы уақытта да жалғасын табатынын жеткізді.
