2025 жылдың 24 сәуірінде Семей қаласындағы «Жеңіс саябағында» патриоттық маңызы зор ерекше іс-шара өтті. «Жеңіс алаңындағы» Мәңгілік оттан алынған алау салтанатты түрде ҚР ҰҚК Шекара қызметі Абай облысы бойынша департаментінің әскери қызметшілері Тәуелсіз Мемлекеттер Достастығы аясындағы «Жеңіс эстафетасы» символын қабылдау рәсімі ұйымдастырылды.
Шара аясында Қазақстан Республикасының туы ортаға шығарылып, мемлекеттік Әнұран орындалды. Қонақтар мен делегаттар Мәңгілік алауға гүл шоқтарын қойып, Ұлы Отан соғысында қаза тапқандарды бір минут үнсіздікпен еске алды. Құрметті қарауыл, «Жас ұлан» тәрбиеленушілері және эстафета тобы салтанатты саппен сап түзеді.Шараға “Застава Тарландары” Ардагерлер Қоғамдық Бірлестігінің ардагерлері де арнайы қатысып, Мәңгілік алауға гүл шоқтары мен венок қойып, соғыс құрбандарын үнсіздікпен еске алды.
Эстафетаны алып жүру құрметі ҚР ҰҚК Шекара қызметі Абай облысы бойынша департаменті Мақаншы ауданы бойынша шекара басқармасының мерзімді әскери қызметшісі, Кеңес Одағының Батыры Қанаш Қамзиннің шөбересі – қатардағы жауынгер Ескендір Қамзинге берілді. Эстафета тобының жетекшісі – Ұлы Отан соғысының ардагері Жексебаев Баймұханбеттің немересі, капитан Ахет Баймұхамет.
Іс-шарада Семей қаласы әкімінің орынбасары, «Абай облысы Қорғаныс істері департаментінің бастығы полковник Руслан Омаров, ҚР ҰҚК Шекара қызметі Абай облысы бойынша департаменті бастығының бірінші орынбасары полковник Қуандық Утяпов, сондай-ақ Семей қаласы ардагерлер кеңесінің төрағасы Кенжебай Бердікенов құттықтау сөз сөйледі.
Бұл шара – отансүйгіштік рухты дәріптеудің, жас буынның тарихи жадын оятудың нақты үлгісі болды. Қатысушылар рухани әсер алып, елдік пен ерлікті ұлықтаған сәттерге куә болды.
Мерекелік концерт барысында соғыс тақырыбындағы әндер орындалып, көрермендер патриоттық рухпен серпілді. «Ер жүрек ел», «Смуглянка», «Ұландар шеруі» сынды туындылар ерекше ықыласпен қабылданды.
Жеңіс рухын жеткізген алау енді Аягөз қаласына жол тартып, Жетісу облысы делегациясына табысталмақ.
