Аймақта биыл атаулы әлеуметтік көмек (АӘК) 36 371 адамға беру жоспарланған. Облыстық жұмыспен қамту және әлеуметтік бағдарламаларды үйлестіру басқармасының басшысы Айман Нұрлыбектің айтуынша, биыл 1 қаңтардан бастап атаулы әлеуметтік көмек тағайындау үшін кедейлік шегі халықтың медиандық кірісінің 35%-ы мөлшерінде, бірақ өңірлік ең төменгі күнкөріс деңгейінің 70%-нан төмен емес мөлшерде белгіленді.
– Бүгінде Абай облысының 2 қаласы мен 10 ауданында Мансап орталықтары жұмыс істейді. АӘК-ке мұқтаж азаматтарды қабылдау үшін 111 маман қызмет атқарып отыр. Биыл атаулы әлеуметтік көмек төлеуге 5,8 млрд теңге бөлінді. Сонымен қатар, 6 878 балаға қосымша төлемдер ретінде 391 млн теңге қарастырылған, – деді Айман Нұрлыбек.
Жыл басынан бері облыс бойынша атаулы әлеуметтік көмек 2 011 отбасындағы 10 308 адамға 275,7 млн теңге көлемінде тағайындалды. 2 845 балаға 32,9 млн теңгеге қосымша төлем берілген.
Бүгінде облыстың қалалары мен аудандарында құрамында 815 мүшесі бар 146 учаскелік комиссия мұқтаж отбасыларды анықтау бойынша жұмыстар жүргізіп жатыр.
