Өткен жылдармен салыстырғанда ағымдағы маусымда қалаға қар қалың түсті. Арқаның аязы болмағанымен, қалың қар да қала көшелерінде қатынауға өз қиындықтарын әкеледі. Дегенмен коммуналдық қызметтер күшейтілген режимде жұмыс істеп, көшелер мен жолдар қардан тәулік бойы тазартылуда. Қала көшелерінде арнайы тазалау машиналары мен тракторлар тәулік бойы қар тазалау жұмыстарын жүргізуде.
{jcomments on}Семей қаласы тұрғын-үй коммуналдық шаруашылық, жолаушылар көлігі және автомобиль жолдары бөлімі мамандарының айтуына қарағанда, қазіргі таңда қала тұрғындары үшін алаңдауға еш негіз жоқ. Қыстың қамын жаз ойлап, арнайы техникалар қысқа әзірленген. Арнайы өткізілген тендердің нәтижесінде қала көшелерін қардан тазалауға бірнеше арнайы мекеме жұмылдырылды. Олардың негізгісі «Семей» көркейту және көгалдандыру мемлекеттік коммуналдық мекемесі болса, оған қосалқы мердігерлерге «Гордорстрой» ЖШС, «Озон» ЖШС, «Баймагамбет» ЖШС жатады.
Қазір қаланы қалың қардан тазартатын мамандардың жұмысы қауырт. Олар бірінші кезекте шаһардағы қоғамдық көліктер жүретін көшелер мен әлеуметтік маңызы бар мекемелердің кіреберіс жолдарын қардан тазартады. Қала бойынша көшелердің жалпы ұзындығы 240 шақырымды құрайды. Коммуналдық қызмет өкілдеріне қар түскен сайын осынша жолды тазартуға тура келеді. Осы уақытқа дейін қала сыртына 29 545 кубтан астам қар шығарылыпты. Ал 20 қаңтар күні 1 718 куб қар шығарылған.
Қаланың басты көшелері күндіз көлікке толы болғандықтан, жұмыстар, негізінен, түнгі уақыттарда атқарылады. Бұл жұмыстарға жұмысшылардың негізгі күші жұмылдырылады. Олардың құрамында ондаған техникалар бар, атап айтсақ, 19 құм шашатын, 8 автогрейдер, 15 сыпыратын техника, 15 самосвал, 15 қар тиегіш және 5 шағын тракторлар бар.
Семей қаласы ТҮКШ бөлімінің ақпараты
негізінде әзірлеген
Асан МЫРЗАХАНОВ.
