ШҚО бойынша ірі және орта өндіріс орындарының аяғынан қаз тұрып, өңір экономикасына еселі үлесін қосып жатқанын Жарма ауданының үш бірдей өндіріс орындарынан аңғаруға болады. Соның бірі аудан орталығы Қалбатауда ораласқан «Қалбатау құдық жабдығы зауыты» ЖШС тыныс-тіршілігінен өңірдің өндірістік тыныс-тіршілігін толық тани аламыз. Іргетасы КСРО кезіндегі алғашқы бесжылдықтарда құрылған, 1933 жылдан бері жөндеу-механикалық зауыт атағын иеленген кәсіпорында қазіргі таңда 125 адам еңбек көрігін қыздырып жатыр.
{jcomments on}Зауыт 2005 жылы қайта жарақтандырудан өтіп, заман талабына сай өнім өндіруге ден қойды. Өндіріс орны үш алып цехтан — құю, жону және құрастыру блогтарынан -тұрады. Мемлекеттік тапсырыс бойынша жылу, мұнай және су насостарының сыртқы қорабын өздерінде түрлі көлемде құйып, ішкі механизмдерін құрастырып болған соң, еліміздің әр түпкіріндегі тапсырыс иелеріне жолдап отырады. 2014 жылы зауыт 327,2 млн. теңгенің өнімін шығарып отыр.
Зауыт конструкторлар бюросының бас маманы Азалия Ерболатқызының айтуынша, «Жұмыспен қамту 2020» бағдарламасы бойынша 5 адам жұмысқа алынып, қазір жаңа мамандықты игеріп, қоғамға пайдалы еңбекпен айналысып жүр. Құны 14,2 млн. теңге тұратын үш жаңа қондырғыны зауыт жұмысшыларының бас білдіре алғаны қуантады, әрине. Осылайша, Қалбатау құдық жабдығы зауыты» ЖШС 2014 жылды толайым табыспен аяқтады. Мұның барлығын аудан әкімдігінің өндіруші секторға баса көңіл бөліп отырғандығынан деп ұққанымыз жөн.
Серік ӘБІЛҚАСЫМҰЛЫ,
Жарма ауданы.
