Елімізде кәсіпкерлікті дамыту үшін қолайлы жағдай жасалған. Кешегі күні жұртқа шұжығымен танымал болған жеке шаруашылық серіктестігі бүгінде қанат жайып, нан және кондитерлік өнімдерімен ерекшеленуде.
{jcomments on}«Шваб шұжығы» ЖШС-нің бөлімі ретінде құрылған «Тәтті — Дәмді» ЖШС үржарлықтарды ас атасы нанмен және кондитерлік өнімдермен қамтамасыз етуде. Ол үшін наубайхана мен кондитерлік цех ашылған. Бұл екі цехта 15 адам жұмыспен қамтылып отыр. Мұнда тәулігіне 1700 нан және техникалық бұйымдарсыз, қолдан түрлі печенье, кекс, торт сынды әртүрлі кондитерлік тағамдар дайындалады. Цех басшысы Максим Демочкиннің айтуынша, нанның өзі ұнның сұрыпы мен дайындалу әдісіне қарай бірнеше түрге бөлінеді. Құрамы химиялық жағынан таза өнім екен.
— Нан өндірісінде химиялық қопсытқыштарды қосудан біз бас тартамыз, химиялық қопсытқыштары бар пісірілген нан адам ағзасына зиянын тигізіп, гипертония ауруына шалдықтырады. Біздің нан 3-4 күнге дейін өзінің сапасын жоғалтпайды, үгітілмейді және де онда үй нанының дәмі бар. Өйткені қамырды бұрынғы ата-бабаларымыздың тәсілімен қолмен илеп, әбден ашытып, таза дайындаймыз. Алдағы уақытта күніне 3000-ға дейін нан шығару ойымызда бар, — дейді технолог Майраш Оспанова.
Бұл кәсіпорын өндірген өнімдер аудан бойынша 30-дан астам дүкендерге жеткізіледі. Басшыларының айтуынша, цехты кеңейтіп, инновациялық әдістерді қолдану да ойда бар екен.
— Ресейден үлкен ротациялық пеш пен формалық машина алдыру жоспарымызда бар. Халыққа сапалы өнім шығарып, қазіргі сұранысымызды жоғалтпай, өндірісімізді өркендетуді мақсат етіп отырмыз,- дейді «Тәтті-Дәмді» ЖШС-нің басшысы Саян Нұрсиленов.
Бауыржан ЖАҚЫП,
«Семей таңы»
