Үржарлық ата-аналар мен балғындар үшін қаңтар айы жағымды жаңалығымен ерекшеленді. Өткен аптада аудан орталығында «Ер Төстік» атты мемлекеттік балабақша ашылып, халықты қуанышқа кенелтті.
{jcomments on}Бүгінгі таңда еліміздің келешегі жас ұрпақ деп, бала тәрбие-сіне қоғам ерекше көңіл бөліп отыр. Бұл жөнінде Президентіміз Н.Ә.Назарбаевтың Жолдауында нақты айтылып, алға қой-ған міндеттердің орындалуына жете назар аударылып келе жатқаны да тектен-тек емес. Қазіргі кезде ұрпаққа тәрбие мен білім беру мектепке дейінгі мекемелерден, балабақшалардан бастау алады. Ұлт тәрбиесін басты мәселе санайтын Үржар ауданы басшылығы бүлдіршіндерді балабақшамен қамтамасыз етуді жолға қойған. Қазіргі заман талабына сай көрікті де көркем бүлдіршіндер ордасы — «Ер Төстік» балабақшасы сөзіміздің дәлелі десек те болады.
140 орынға арналған балабақша 6 топ балаларына арналған бөлмелер, акт залы және өзге де қажетті бөлмелермен қамтамасыз етілген. Нысан құрылысымен «Капсантехремонт» ЖШС айналысқан. Мердігер мекеменің жауаптылары Жанабай Сауытов пен Тимур Кенжебековтердің айтуынша, балабақшаның бой көтеруіне 300 млн. теңге шамасында қаржы жұмсалыпты.
Балабақшаның ашылу салтанатына облыстық мәслихаттың депутаты Рысқан Жанкүшікова, аудандық мәслихаттың хатшысы Мұхаметқали Бітімбаев, «Нұр Отан» партиясының Үржар аудандық филиалы төрағасының бірінші орынбасары Бақтыбай Баймұратов, аудандық білім бөлімінің басшысы Біржан Тұрлыбеков және өзге де бөлім басшылары мен БАҚ өкілдері қатысты. Шара барысында алғашқы болып сөз алған Мұхаметқали Бітім-баев үржарлықтарды балабақшаның пайдалануға берілуімен құттықтады.
— Бұл балабақшада тәрбиеленіп, білім алған балалар ертең еліміздің дамуына үлес қоспақ. Мұндай нысандардың ашылуы Үржар ауданында әлі де жалғасын табатын болады. Бүгінгідей қуаныштарымыз көп болсын, жаңа балабақшаға қадам басқан бүлдіршіндер абыройлы азаматтар мен азаматшалар болып өссін, — деп ақ тілегін білдіре келе, өнегелі істердің барлығы халықтың игілігі үшін екендігін атап өтіп, аудан әкімдігі атынан балабақша ұжымына сыйлық тарту етті.
Өз кезектерін ұзақ жылдар бойы балабақша тәрбиешісі болып еңбек еткен Лиза Аринова мен мердігер Тимур Кенжебеков те жылы лебіздерін білдірді.
Салтанатты түрде «Ер Төстіктің» лентасын қию құрметі аудандық Ардагерлер кеңесінің төрағасы Нұрланбек Сандыбаевқа, ардагер тәрбиешілер Лиза Аринова мен Айнаш Мұхаметжановаларға берілді. Салтанатты рәсімнен кейін қазақы дәстүрмен әжелер ансамблі шашу шашты. Жиылған қауым «жақсыны көрмекке» демекші, заманауи балалар бақшасын аралап, бөлмелерімен танысып, балғындар үшін игілікті істің басында болған аудан әкімі С.Зайнулдинге алғыс айтты.
Бауыржан ЖАҚЫП,
«Семей таңы»
