Тарбағатай ауданының әкімі Ділдабек Оразбаев ауыл еңбеккерлерімен биылғы есептік кездесулерін Сәтбаев, Көкжыра, Екпін ауылдарынан бастады. Жиындарда аталып өтілгеніндей, Тарбағатай ауданы өткен жылды әлеуметтік — экономикалық даму көрсеткіштерінің барлық түрін артығымен орындап, облыстағы алдыңғы алты ауданның қатарында болған. Мал басын өсіріп, тұқымын асылдандыру, егін егу, құрылыс салу, белсенді кәсіпорындардың қатарын арттыру, халықты сапалы ауыз сумен қамтамасыз ету, мектепке дейінгі балаларды балалар бақшасына орналастыру, әлеуметтік салалардың жұмысын жетілдіру сияқты негізгі қызмет салалардағы жұмыстар айта қаларлықтай жақсарған.
{jcomments on}Былтырғы қол жеткен табыстарды саралап айтумен қатар, аудан әкімі облыс басшысы Даниал Ахметов алға қойған нақты тапсырмаларға орай Тарбағатай ауданын болашақта ет өнімдерін өндіру бағытында жұмыс істейтін ауданға айналдыру үшін қандай маңызды шараларды жүзеге асыру қажеттігіне де жан — жақты тоқталды. Ауданда ірі қара малын өсіру болашақта басым бағыттардаң бірі бола алатынына нақты дәлелдер келтірді. Дәстүрлі мал шаруашылығын ойдағыдай өркендету үшін оның сенімді азық қорын жасау керектігін айтқан аудан басшысы ең алдымен егіншілікті дамыту, суармалы жерлерді тиімді пайдалану қажеттігін баса көрсетті. Аудан өзендеріндегі су жүйелерін жөндеп, ретке келтіру, мал азығына дақылдар егу мөлшерін арттыру, сол арқылы мал семірту саласын дұрыс жолға қою міндеттері алда тұрғанын айтты. Биыл 15 мал семірту алаңдарын іске қосу, оның төртеуін 400 бастық мал бордақылау орнына айналдыру қажеттігін ескертті. Сонымен қатар ауыл тұрғындарын өз үйлері жанынан шағын мал семірту орындарын ұйымдастыруға шақырды.
«Өсірген, семірткен малымызды қайда апарып сатамыз, жылдағыдай оңтүстіктің алыпсатарлары арзан бағамен алып кетпей ме?» деген көпшіліктің сауалына орай аудан басшысы Ділдабек Тәжібайұлы қытай елінің мамандарымен келісе отырып, таяу арада ауданнан бір мал сойып, ет өңдейтін, одан оншақты түрлі дайын өнім түрлерін әзірлеуге қабілетті зауыт салу көзделіп отырғанын алға тартты.
Егіншілікті дамыту мәселелеріне келгенде аудан басшысы ендігі жерде егіншілікке мемлекеттік көмек ретінде берілетін субсидия нақты еңбек табыстарына тікелей байланысты болатынын ескертті. Сол арқылы мемлекеттік көмек өндірісті тікелей дамытуға, оны техникалық жағынан жарақтандыруға бағытталатынын атап өтті.
Сәтбаев ауылының тұрғындары ауылдарына әкім тұрақтамайтынын, ауыл басшысына лайық азаматтар өз ауылдарынан да табылатынын, ауылды тастап басқа жаққа көшіп кетіп жатқандар көбейгенін айтса, көкжыралықтар ауыз су мәселесін қозғады. Су құбырының сапасына тұрғындар сенімсіздікпен қарайтыны белгілі болды. «Көкжыра» өндірістік кооперативінің басшысы М.Аязбаев Серіктес ауылына таяу жердегі мал бордақылау алаңына электр жарығын жеткізу қиындығы шешілмей отырғанын жеткізді. Ауданда есептік жиындар одан әрі жалғасуда.
Хамза СӘТИЕВ,
«Семей таңы»
