Өткен жылдың қазан айының соңғы күндері басталған мемлекеттік қызметкерлер арасында ұйымдастырылған қалалық спартакиада осы жылдың қаңтар айының ортасында қорытындыланды. Спорттың әр түрін қамтып, екі жарым айға созылған спартакиада жеңімпаздары өткен аптада Семей қаласы әкімдігінде марапатталды. Марапаттау рәсіміне Семей қаласы әкімінің орынбасары Сәкен Нұртазаев қатысты.
{jcomments on}Бұл осымен мемлекеттік қызметкерлер арасында ұйымдастырылған он бесінші спартакиада. Биылғы жарыста спорттың сегіз түрі бойынша төрт жүзге жуық адам бақ сынасты. Олардың арасында қала әкімдігінің бөлімдерімен қатар, облыстық, республикалық дәрежедегі мемлекеттік органдар қызметкерлері бар. Осы жолғы спартакиаданың алдыңғыларынан бір ерекшелігі — бір ай көлемінде емес, төрт ай бойы өткізілуі. Сонымен қатар қатысушылар саны да артқан. Дәстүрлі жарыстың қорытындысы бойынша әрбір спорт түрінен қала құрамалары жасақталып, олар облыстық спартакиадада қала намысын қорғайтын болады.
Жиын барысында сөз сөйлеген қала әкімінің орынбасары Сәке Нұртазаев мұндай жарысты ұйымдастырудың маңызы жайлы айта келе, оған барлық мемлекеттік органдардың қатысып келе жатқанын атап өтті.
— Спартакиада барлық спорт түрлері бойынша ұйымдастырылды. Өз басым мұндай жарыстарға қатысып тұру мемлекеттік қызметкерлер үшін өте пайдалы іс деп есептеймін. Себебі спорттық жарыстарға қатысу арқылы біз өз денсаулығымызды нығайтып қана қоймай, халық арасында салауатты өмір салтын насихаттаймыз, — деді Сәкен Рүстемұлы.
Спартакиада қорытындысы бойынша құқық қорғау органдары арасында жалпыкомандалық есепте Семей қаласы ішкі істер басқармасы үшінші орынды иеленді. Екінші орын ҰҚК – нің Семей қалалық басқармасының еншісінде. Бірінші орынға Семей қаласы өртке қарсы қызмет басқармасының спортшылары қол жеткізді.
Азаматтық қызметкерлер арасында қалалық сот командасы үшінші орын алды. Екінші орын Семей қаласы қазынашылық басқармасының еншісіне тиді. Ал бірінші орынға Семей қалалық Мемлекеттік табыстар департаменті қол жеткізді.
Барлық жеңімпаздар мен жүлдегерлер арнайы грамоталармен және сыйлықтармен марапатталды. Сондай-ақ, әртүрлі аталымдар бойынша үздік деп танылған командалар мен жекелеген қатысушылар мақтау қағаздарына ие болды. Марапаттау рәсімінен кейін Сәкен Нұртазаев жеңімпаздар мен жүлдегерлерді құттықтап, жылы лебізін білдірді.
— Елбасымыз спортты дамытумен қатар, спортпен айналысу өте маңызды екенін айтуда. Бұл әсіресе мемлекеттік қызметкерлер үшін үлкен мәнге ие. Сол себепті тағы бір мәрте мұндай спартакиаданың өткізіліп келе жатқанына қуанышты екенімді айтқым келеді, — деді қала әкімінің орынбасары.
Жиын соңында жеңімпаздар мен жүлдегерлер және әртүрлі аталымдар бойынша үздік деп танылып марапатқа ие болғандар естелік суретке түсті.
Мирас ҚҰСАЙЫН,
«Семей таңы»
