Semeytany.kz – Абай ауданында 50 орындық жаңа әлеуметтік орталық есігін ашты. Ашылу салтанатына облыс әкімі Берік Уәли арнайы қатысып, бұл нысанның маңыздылығын атап өтті.
Жалпы ауданы 310 шаршы метрді құрайтын орталықта үш бағыт бойынша қызмет көрсетіледі: 30 адамға арналған жартылай стационар, 125 адамға үйде қызмет көрсету бөлімшесі және 10 адамға арналған отбасын қолдау орталығы. Барлығы 13 кабинеттен тұратын мекемеде 31 қызметкер жұмыс істейді. Мұнда физиотерапия, емдік дене жаттығулары, массаж, психологиялық қолдау және мүмкіндігі шектеулі жандарға арналған кешенді оңалту қызметтері қарастырылған.
Орталықтың ашылуына ерекше үлес қосқан – жергілікті тұрғын Сейфолла Рахымбаев. Ол өзіне тиесілі екі қабатты ғимаратты мемлекет меншігіне тегін беріп, әлеуметтік жобаның жүзеге асуына мүмкіндік жасады. Ал нысанды күрделі жөндеуден өткізу мен жабдықтауға облыстық және республикалық бюджеттен қаржы бөлінген.
Салтанатты шарада сөз сөйлеген аймақ басшысы Берік Уәли орталықтың символдық маңызын атап өтті.
– Семей полигонының зардабын ең көп тартқан өңір – Абай ауданы. Ядролық жарылыстардың салдары мыңдаған адамның денсаулығына әсер етті. Сол зардаппен күрес бүгін де жалғасуда. Президент тапсырмасымен ашылған бұл орталық – тек емдеу емес, адамға деген құрметтің, үміттің белгісі. Орталықтың ашылуына атсалысқан Сейфолла Рахымбаевқа алғысымды білдіремін, – деді облыс әкімі.
Берік Уәли орталыққа 16 орындық инватакси көлігінің кілтін де табыстады. Жаңа мекеменің ашылуы тұрғындар тарапынан үлкен ризашылыққа ие болды. Қарауыл ауылының тұрғыны Сәуле Райымбекова ата-аналар атынан алғыс айтып, бұл бастаманың шын мәнінде өмір сапасына оң ықпал ететінін жеткізді.
