Кеше қаламызда құрамында Беларусь Республикасы Өндіріс министрлігінің сыртқы экономикалық байланыстар департаментінің басшысы В.Волчок, аталмыш елдің Қазақстандағы елшілігінің кеңесшісі Г.Клыга «МАЗ» ААҚ-ның бас директорының орынбасары бар делегация болып қайтты. Сапар мақсаты – «Семей машинақұрастыру зауыты» ААҚ негізінде «МАЗ» маркалы автокөліктерді құрастыру жұмыстарын жүзеге асыру бойынша келісімге қол қою. Осыған байланысты «Семей машинақұрастыру зауыты» ААҚ-ның бас директоры Нұрлан Омаровтың қатысуымен арнайы кездесу өтті.
{jcomments on}- Біз үшін бұл жобаны іске асыру қаншалықты қызықты болса, соншалықты қиын екенін білеміз. Әрі осы бағыттағы жұмыстар дағдарыс кезіне тап келіп тұрғанын да түсінеміз. Дегенмен Елбасы айтқандай, іркілістен кейін алға өрлеу болатыны да мәлім. Сондықтан бұл жобаның сәтті жүзеге асырылатынына сенімдіміз. Әрі өнімнің бұл түрі сұранысқа ие болады деп білемін, — деді «МАЗ» маркалы автокөліктерді құрастыру жобасы туралы «Семей машинақұрастыру зауыты» ААҚ-ның бас директоры Нұрлан Омаров.
Сондай-ақ, ол сөзінде Минск автомобиль зауытымен бірлесе отырып, тіркемелер шығару қолға алынғанын жеткізді. Осыған дейін өндіріс орнында құрастырылған 100 тіркемені еліміздің Қорғаныс министрлігі сатып алғанын да айтып өтті.
Жалпы, жоба құны шамамен бір жарым миллиардтай теңгені құрамақ. Оның 600 миллионын зауытты қайта жаңғырту жұмыстарына, 700 миллионын көпбағытты қондыр-ғыларды сатып алуға бөлу көзделіп отыр. Өндірістік қуат көлемі бойынша 1000 «МАЗ» маркалы автокөлік пен 1000 тіркеме құрастыру жоспарлануда. Нәтижесінде зауытта жүзге тарта жаңа жұмыс орны ашылады деп күтілуде. Ауқымды жобаның жүзеге асырылуы машинақұрастыру саласының өркендеуіне септігін тигізіп қана қоймай, еліміздің, өңіріміздің экономикалық тұрғыда дамуына қосымша серпін бермек.
Бір айта кетерлік жайт — Беларусь тарапы «МАЗ» маркалы автокөліктерді құрастыру технологиясымен бөлісуде. Сонымен қатар «Семей машинақұрастыру зауыты» ААҚ басшылығы Минск автомобиль зауытының негізінде мамандардың біліктілігін арттыру жұмыстарын қолға алуды жоспарлауда.
Жалпы, жоба аясында «МАЗ» маркалы автокөліктерді құрастыру ағымдағы жылдың шілде айында қолға алынады деп күтілуде.
Мирас ҚҰСАЙЫН,
«Семей таңы»
