Сәрсенбі күні қала әкімі Айбек Кәрімов Достық үйінде қаламыздағы ұлттық—мәдени орталықтардың төрағаларымен кездесті. Жиын барысында мерейлі даталарды атап өту аясында ұйымдастырылатын шаралар жоспары жайлы айтылды. Сондай—ақ Достық үйінің директоры Аманғазы Тілеубаев 2014 жылы атқарыл—ған жұмыстар мен ағымдағы жылға межеленген шаруалар туралы ақпарат берді.
{jcomments on}Басқосу басында Достық үйінің директоры Аманғазы Тілеубаев 2014 жылы жүзеге асырылған жұмыстар туралы айтты. Былтыр ұлттық-мәдени орталықтар әр ай сайын концерт, көрме, байқау, фестиваль мен дөңгелек үстел түрінде екі-үш шарадан өткізіп тұрғанын атап өтті. Былтырғы жылдың қыркүйек айынан бастап жыл соңына дейін 17 шара ұйымдастырылған көрінеді.
— Достық үйі қабырғасында ұлттық-мәдени орталықтар жұмыстарына қаламыздың атқарушы билігі тарапынан белсенді қолдау көрсетіліп келеді. Мысалы, 2014 жылы жергілікті бюджеттен масленица, сабантой, Қазақстан халықтарының бірлігі күні, Жеңіс күні сияқты мерекелерді атап өтуге және «Қайран ерлер, қаһарман ардагерлер», «Прииртышские напевы» байқауларының ұйымдастырылуына арнайы қаражат бөлінді,- деді Достық үйінің басшысы.
Сонымен бірге Аманғазы Тілеубаев ағымдағы жылы аталып өтілетін Қазақ хандығының 550 жылдығын, Ұлы Абайдың туғанына 170 жыл толуын, Ата заңымыздың 20 жылдығын, Қазақстан халқы Ассамблеясының 20 жылдығын, Жеңістің 70 жылдығын атап өту аясында ұйымдастырылатын шаралар жайлы айтып өтті. Аталған мерейтойлардың барлық халық үшін үлкен мәнге ие екенін де тілге тиек етті. Сондай-ақ Қазақстан халқы Ассамблеясының 20 жылдығын тойлаудың басталуы жайлы айтты
— Қазақстан халқы Ассамблеясының жылы 6-шы ақпанда таңғы сағат 11:00-де бастау алады. Астана мен Алматы қалаларында және еліміздің барлық өңірлерінде, оның ішінде Семей қаласында, осыған орай кең ауқымды шаралар өткізу көзделіп отыр. Қаламыздың барлық мекемелерінде, оқу орындары мен кәсіпорындарында Қазақстан халқы Ассамблеясы жылының басталуына арналған әртүрлі шаралар ұйымдастырылмақ. Сондай-ақ қалалық Достық үйінде Қазақстан халқы Ассамблеясы жылының ашылуына орай салтанатты жиын өткізу жоспарлануда,-деді Аманғазы Исабекұлы. Сонымен қатар ол Достық үйі Қазақстан халқы Ассамблеясы жылына арналған елу шара ұйымдастыру көзделіп отырғанын айтты. Ұлттық-мәдени орталықтары да өз іштерінде арнайы шаралар өткізетінін тілге тиек етті.
Жиында сонымен бірге осы шаралардың барлығының негізгі мақсаты – Елбасы жүргізіп келе жатқан татулық пен келісім саясатының төңірегінде халықтың бірлігін нығайту болып табылатыны сөз болды. Мемлекет басшысының жалпыхалықтық «Мәңгілік Ел» идеясының орындалуы үшін қоғамдағы ынтымақ пен берекені арттыру жолындағы бастамалар жүзеге асырылып жатқаны айтылды. Осы орайда Достық үйінің директоры Қазақстан халқы Ассамблеясы жылының басты идеясы «Менің Елім – «Мәңгілік Ел» болатынын жеткізді.
Өз кезегінде қала әкімі Айбек Кәрімов мерейтойлық даталарға арналған шаралардың мазмұнына баса мән беру керектігін атап өтті. Ұлттардың салт-дәстүрлеріндегі ұқсастықтар мен ерекшеліктерді дәріптеу, жастарды тәрбиелеу жолдарына көңіл бөлу қажеттігін тілге тиек етті. Осы мерейтойларды атап өту аясындағы шараларға барлық ұлттық-мәдени орталықтар атсалысуға тиіс екенін айтты.
— Өздеріңіздің төл дәстүрлеріңізді көпшілікке паш етудің, өз ұлттарыңыздың мәдениетін дәріптеудің қандай жолдарын қарастырасыздар? Сіздер істеп жатқан шараларыңызда негізгі тақырыппен, Қазақстан халқы Ассамблеясы жылын атап өтудің мақсатымен, басқа ұлттық-мәдени орталықтардың өткізетін шараларымен мазмұндық тұрғыда қалай байланыстырасыздар? Міне, бүгінгі таңда осы сұрақтарға жауап тауып, соған сәйкес жұмыс істеу маңызды,- деді қала басшысы. Сонымен қатар Айбек Кәрімов Елбасының «Нұрлы жол – болашаққа бастар жол» атты жолдауында ұлтаралық татулық пен келісім мәселелеріне назар аударылғанын, қазіргі таңда бұл құндылықтардың үлкен стратегиялық мәнге ие болып отырғанын атап өтті.
Жиын барысында сөз алған ұлттық-мәдени бірлестіктердің өкілдері де ынтымақ пен бірлікті нығайту жолында атқарып келе жатқан жұмыстары туралы айта келе, осы бағыттағы шаралар жайындағы ойларын ортаға салып, биылғы жылға межеленген мерейтойлық даталардың аталып өтуіне мүмкіндіктерінше атсалысатындарын жеткізді.
Мирас ҚҰСАЙЫН,
«Семей таңы»
