Облыс әкімі Даниал Ахметов сәрсенбі күні жұмыс сапарымен Бородулиха ауданында да болып, жергілікті шаруа қожалықтардың тыныс—тіршілігімен танысты.
{jcomments on}Аймақ басшысы Бородулиха ауданындағы іссапарын облыс бойынша бүгінгі таңда жұмыстары жақсы жолға қойылған «Новая заря», «Лазарев және К», «Е. Зәйтенов» шаруа қожалықтарымен танысудан бастады. «Новая заря» шаруа қожалығының иесі Ахмет Матаев облыс әкімін Семейде қуаттылығы тәулігіне 50 тоннаға жететін сүт өнімдерін қайтара өңдеу комбинатын тұрғызу барысындағы алдағы жоспарымен таныстырды. Сүт бағытындағы симменталь сиырлары Германиядан әкелінбек. Осы орайда аймақ басшысы:«Германияға сиырларды алуға барғанда, міндетті түрде облыстық ауылшаруашылығы басқармасынан немесе жауапты орындардан кәсібін жетік білетін сала мамандары бірге барғаны дұрыс. Бізге қажетті ірі қаралар іріктеліп таңдалмаса, ол жақтағылар басқасын тиеп жіберуі мүмкін», – деп ескертті Д. Ахметов.
Облыс әкімі сонымен қатар, тұтынудағы шетелдік азық-түліктердің орнын отандық өнімдердің алмастыруы қажеттілігінің маңыздылығын атап өтті. «Біздің облыста қазіргі уақытта білім және денсаулық сақтау салалары жалпы сомасы 1,5 млрд. теңгеге сапасы белгісіз сүт сатып алып отыр. Бұдан былай ондайға жол берілмеуі керек. Ендігі кезекте әлеуметтік мекемелер сүт пен сүт өнімдерін өңіріміздегі сүт зауыттарынан сатып алатын болады. Бұл екі жаққа да тиімді», – деді Д. Ахметов.
Бұған қоса аймақ басшысы өзінің орынбасары Дүйсенғазы Мусинге сүт қабылдау бекеттерінде орналасатын инженерлік жүйелермен қамтыл-ған Ресейде шығарылатын модульдік ғимараттардың қондырғыларын Өскемендегі «Үлбі металлургиялық зауытында» шығару мәселесін, сол сияқты сүт тасушы жүк көліктерін сырттан сатып алмау үшін Семейдегі «СемАЗ» кәсіпорнында жабдықталған көліктерді құрастыру қажеттігін қарастыруды да тапсырды.
Облыстағы әлеуметтік мекемелерді жергілікті жерде өндірілетін сүт өнімдерімен қамтамасыз ету мәселесін жолға қоюды қатаң тапсырды.
Өз тілшіміз.
