Semeytany.kz – Облыс әкімі Берік Уәлидің төрағалығымен өткен кеңейтілген аппараттық кеңесте өңірдегі интернет сапасы мен қолжетімділікті жақсарту мәселесі талқыланды.
Цифрлық технологиялар басқармасының басшысы Абзал Серікұлының айтуынша, қазіргі таңда облыстағы 252 ауыл немесе 77%-ы сымды және мобильді интернетпен қамтамасыз етілген. Оның ішінде 93 елді мекенде талшықты-оптикалық байланыс бар. Ал 233 ауылға әлі де оптикалық интернет желісі тартылуы қажет.
«Қолжетімді интернет» ұлттық жобасы аясында республика бойынша 2991 ауылдық елді мекен жоғары жылдамдықты интернетпен қамтылады. Соның ішінде Абай облысының 179 ауылдық елді мекені бар. Жоба 2027 жылға дейін өңірдің интернетпен қамтылу деңгейін 96%-ға жеткізуді көздейді.
Сонымен қатар, облыс аумағындағы республикалық және облыстық жолдар бойында да интернет пен байланыс сапасы төмен учаскелер кездеседі. Осыған орай, ұлттық жоба аясында негізгі жолдар бойында 40 антенна-діңгек салу жоспарланған. Жол картасы аясында өткен жылы 23 антенна-діңгек салу көзделсе, оның 15-і пайдалануға беріліп, 4-еуі жеке қаржымен іске асқан. Қалған 8 ауылда құрылыс және жобалау жұмыстары жалғасуда.
Кеңес барысында аймақ басшысы туристік аймақтарда да интернет сапасын арттырудың маңызды екенін атап өтті. Цифрлық технологиялар басқармасына байланыс операторларының жұмысын қатаң бақылауды, сапасыз қызмет көрсеткендерге шара қолдануды және министрлікпен тығыз жұмыс жүргізіп, ай сайын нәтижесін баяндап отыруды тапсырды.
