Semeytany.kz – Абайдың 180 жылдығына орай Қазақстан Республикасы Бас прокуратурасы Семейдегі Абай музейіне ерекше тарту жасады. Бүгін Бас прокурор Берік Асыловтың атынан аппарат басшысы А.О. Мұхаметжанов ұлы ақын, ойшыл Абай Құнанбайұлының арнайы тапсырыспен жасалған мүсінін музейге сыйға тартты. Сондай-ақ, Бас прокурордың мерейтойлық құттықтау хаты табысталды.
Хатта Абайдың рухани мұрасы халықтың ар-ожданы мен әділдіктің темірқазығы екені, ал «Жидебай-Бөрілі» музей-қорығы сол асыл мұраны ұрпақтан ұрпаққа жеткізетін бірегей орын екені атап өтілген.
Шара барысында облыс әкімі Берік Уәли Бас прокуратура ұжымына ризашылығын білдірді. Ол бұл мүсіннің Абайдың мұрасын дәріптеуде үлкен маңызы барын айтып, ұлы ойшылдың заңгерлік қырына да тоқталды. Әкімнің айтуынша, 140 жыл бұрын Абай Қарамола жерінде төбе би болып сайланып, 73 баптан тұратын дала заңын енгізген.
