Елбасы тапсырмасына сәйкес, жергілікті жердің әлеуметтік – экономикалық ахуалын саралау мақсатындағы аудан әкімі Әнуарбек Мұхтархановтың халық алдындағы есепті жиындары апта басынан бастау алып, кезекті жиын Суықбұлақ кенті мен Жайма, Терістаңбалы ауылдық аумақтық бірліктерінде өтті. Есепті жиындарға ауданның дербес бөлім басшылары да қатысты.
{jcomments on}Жалпы, өткен жиындарды қорытындылай келсек, өңірдің әлеуеті артып, экономикасы тұрақтанып, ілгері басып келе жатуы себебінен тұрғындар тарапынан қордаланып қалған мәселелер емес, күн талабына сай әлеуметтік мәселелер басым көтерілді.
Аудан әкімінің есепті жыл ішінде өңірдің әлеуметтік – экономикалық жағдайын арттыру негізінде атқарылған немесе үстіміздегі жылға көзделген мақсатты жұмыстар турасындағы тезис газетіміздің өткен 15 қаңтардағы №3 санында жарық көргендіктен, оған тоқталуға негіз жоқ.
Халық алдындағы есепті жиын ең алдымен Суықбұлақ кентінде өтті. Кент әкімі Аждар Юсупов жалпы округтің 2014 жылғы әлеуметтік — экономикалық ахуалымен таныстырды. Кент әкіміне халық тарапынан ұсыныс, пікірлер айтылмады.
Өңірдің өткен жылғы жағдайымен таныстырған аудан басшысы өнеркәсіп саласына ерекше тоқталып, үстіміздегі жылға жоспарланған жұмыстарды жіктеп берді. Суықбұлақ кенті бойынша мұнда 80 орындық балабақша салу ісі қолға алынып, құрылыс құжаттарына қажетті сараптама жасалып, жоба өз кезегін күтіп отырғандығын жеткізген аудан басшысы көп жылдар шешімін таппай, жергілікті халық тауқыметін тартып келген электр қуаты мәселесі толығымен шешіліп, бүгінде ауыл көшелерін жарықтандыру жұмысы көзделіп отырғандығын айтты. Сонымен қатар жергілікті Мәдениет үйі ісі де назарға алынып отырғандығын да жасырмады. Ал кезек күттірмейтін ауызсумен қамту жұмысының жобасы мен сараптама дайын, тек жобаны қаржыландыру жағдайын күту қажеттігін жеткізді. Яғни жұмыс жобасы әзір болғандықтан, жұмыстың көбі бітіп, азы қалғандықтан, халықты шыдамдылыққа шақырды.
Жалпы, кент тұрғындары атынан аудандық мәслихат депутаты Толқын Жақсыбаева есепті жыл ішіндегі атқарылған жұмыстарды оң бағалап, жергілікті жерлердегі мәселелер кезеңмен шешімін тауып келе жатқандығын жеткізді.
Осыдан кейін аудан әкімі Әнуарбек Мұхтарханов өткен жылғы ауданның әлеуметтік — экономикалық ахуалы және атқарылған жұмыстарымен таныстырды.
Аудан басшысы өз сөзінде ауылдың болашағына қатысты бірқатар мәселелерге тоқталды. Округте шамамен 300-ден астам халық тіркелген. Ал талапқа сай, әр округте халық саны 500-ден кем болмауы тиістігін алға тартып, алдағы уақытта оңтайландыруға еніп, округтің жабылу қаупі барын ашық айтты. Бұл іске аса ынталы еместігін айтқан аудан әкімі талап болып жатса, орындалуы қажет екендігін тілге тиек етті.
Аудан басшысының кезекті есепті жиыны Терістаңбалы ауылында жалғасты. Өткен жыл ішіндегі ауданның әлеуметтік-экономикалық ахуалын арттыру бағытындағы келелі істермен кеңінен танысқан терістаңбалылықтар аудан әкімінің атқарған жұмысына жоғары баға берді.
Мейірхан ОСПАНБАЕВ,
Жарма ауданы.
