Semeytany.kz — Абай облысында ұлы ақын Абай Құнанбаевтың 180 жылдық мерейтойына арналған ауқымды мерекелік шаралар өтеді, деп хабарлады Абай облысы Мәдениет басқармасы басшысының орынбасары Бауыржан Мұстафин ОКҚ брифингінде.
Қатысушылар қатарында 15 елден келген шетелдік делегациялар, ғылыми және шығармашылық зиялы қауым, жастар, өнер майталмандары және бұқаралық ақпарат құралдарының өкілдері бар. Қазір Абай ауданында 200-ден астам киіз үй тігіліп жатыр. Дайындыққа жүздеген мәдениет қайраткерлері, аспаздар, техникалық мамандар, 530 ерікті мен ардагерлер атсалысуда.
1-10 тамыз аралығында 70-тен астам ірі іс-шара, концерттік бағдарлама, 10 театрландырылған қойылым, 8 көрме мен фестиваль, ұлттық жарыстар, 5 республикалық және халықаралық шығармашылық жоба ұйымдастырылады.
Онкүндік аясында «Абай академиясы» энциклопедиялық порталы іске қосылып, Семей қаласында этноауыл ашылды. Белгілі иллюстратор Аңсаған Мұстафаның «Көңілге түрлі ой салар» көрмесі, «Асыл мұра» қолөнершілер фестивалі және «Адамзаттың алыбы хәкім Абай» мерейтойлық концерті өтті.
Түркістан облысының мәдени күндерінде ауыл шаруашылығы өнімдері жәрмеңкесі, қолөнер шеберлерінің көрмесі, өнерпаздар концерті өтті. Мыңнан астам адам қатысқан «Абай quiz» республикалық зияткерлік ойыны рекордтар кітабына ұсынылды.
