Бесқарағай ауданында аудан әкімі Нұрлан Бәтташұлы Сыдықовтың қолдауымен әрі ауданның бас имамы Серікжан Аманұлы Сасеновтің мұрындық болуымен Мәуліт мерекесіне арналған ауқымды іс-шара өтті.
{jcomments on}Бұл мерекені атап өтудегі басты мақсат Мұхаммед (с.ғ.с.) пайғамбардың әрекеттерін насихаттау, салауат айту, жастарды имандылыққа жетелеу, отансүйгіштікке, бауырмалдыққа, ата-ананы құрметтеуге тәрбиелеу және теріс қылықтардан сақтау болып табылады. Аудандық Мәдениет үйінде аталған шараға осы күні бесқарағайлық жамағат көптеп жиналды. Мұсылман қауымы асыға күткен мерекемен қауышып, кеш бойы жүректерге ой салар салауат тыңдап, кештен рухани азық ала алды. Жылдан-жылға аудан халқының асыл дінімізге деген сүйіспеншілігі артып келе жатқандығын сол күні акт залына халықтың лық толғанына қарап-ақ байқауға болатын еді. Мәуліт мерекесіне арналған осынау кеш «Дариға-ай» жастар театрының қасиетті мерекеге арнап дайындаған бағдарламасы аясында өрбіді. Тағылымдық әрі тәрбиелік мағынасы зор бағдарламаларымен өңіріміздің шалғай ауылдарын аралап, қарапайым халыққа рухани байлық сыйлай білген бұл ұжымның өнерін бесқарағайлықтар да тамашалай алды. 2000 жылы негізі құрылған «Дариға-ай» жастар театры ұжымының басым бөлігі жастар екен. Өнерлерімен сүйсіндіріп, өздерін республикалық, халықаралық деңгейде таныта білген ұжымның бүгінгі басшысы — А.Бахтинов.
Алғы сөз Семей қаласынан арнайы келген имам Мақсат қажы Алтыбай мен аудан әкімінің орынбасары Е.Е.Рахметуллинге берілді. Олар жиналған жұртшылықты Мәуліт мерекесімен құттықтап, жүректен шыққан жылы лебіздерін жеткізді. Бұдан соң сахна төріне алма-кезек шыққан әртістер мен әншілер көрерменді асыл жырмен, тағылымды әнмен әлдиледі. Қазіргі қоғам күйін дөп басып, дертті заманның дауасын іздеген «Дариға-ай» жастар театрының әртістері тағылымы терең «Соқыр ана», «Қарт монологы», «Шайтандар», «Суицид», «Әусек-Сәусек» қойылымдары арқылы жиналған қауымға, әсіресе жас буынға, астарлы ой салып қана қоймай, көрермен көздеріне жас ұялатып, имандылыққа жол сілтей білді.
Қашан да ақынын ардақтаған қазақ халқы үшін әнмен әуелеп, жырмен өрнектелген сөздің артық тұрары сөзсіз. Сондықтан да болар, рухани кештің сәнін келтірген бағдарламада жас имамдардың орындауындағы салауатты халық ұйып тыңдады.
Кеш соңында сөз алған ауданның бас имамы С.А.Сасенов: «Құрметті мұсылман бауырлар! Күллі мұсылман әлемінің қасиетті мерекесі Мәуліт құтты болсын! Шаңырақтарыңызға шаттық, отбасыларыңызға тыныштық, жұмыстарыңызға табыс тілеймін, барша әлемнің Жаратушысы Алла Тағала егеменді еліміздің болашағын жарқын, көк байрағымыздың әрқашан да биік болуын нәсіп етсін. Бүгінгі кеш барлықтарыңыздың көңілдеріңізден шықты деген үміттемін», — деп, мерекені ауқымды түрде атап өтуге қолдау көрсеткен, Алла үйінің жағдайын жақсартуға үлес қосқан дін жанашырларына, атап айтқанда аудан әкімі Н.Б.Сыдықов бастаған бірқатар басшыларға, кәсіпкер азаматтар мен азаматшаларға, қасиетті мерекеде бесқарағай жұртшылығына тәрбиелік мәні зор кеш сыйлап, көрермен көңілінен шығып, ерекше ықылас пен құрметке бөлене білген «Дариға-ай» жастар театрына, ауыл имамдарына ризашылығын жеткізіп, Алғыс хаттар мен естелік сыйлықтарын табыстады.
Әсел ҚАСЫМҒОЖИНА,
«Семей таңы»
