Балалар мен жастардың шығармашылық сарайында ШҚО Білім беру басқармасының, Семей қаласының қоғамдық пәндер бойынша әдістемелік комиссиясы мен Радиотехника және байланыс колледжінің ұйымдастыруымен республикалық ғылыми-зерттеу конференциясы өтті.
{jcomments on}Ғылыми конференция бұрынғы Семей облыстық телекоммуникация басқармасының бас директоры, Қазақ КСР-ның еңбек сіңірген байланысшысы болған Қадыр Тортаевты еске алуға және 75 жылдық мерейтойына орай, «Патриотизм мен азаматтыққа тәрбиелеу — қазіргі заманауи білім берудің негізі» тақырыбында ұйымдастырылды.
Конференция жұмысына Семей қалалық ішкі саясат бөлімінің басшысы Айдар Садырбаев, білім беру басқармасының мамандары, ШҚО телекоммуникация дирекциясының басшылығы, аудандық телекоммуникация тораптарының басшылары мен қаламыздағы колледждердің директорлары мен ұстаздары, республикалық білім ордаларының студенттері және Қ.Тортайұлының туған-туыстары қатысты. Дарынды студенттерді анықтауды көздеген ғылыми жиынның мақсаты — студенттердің бойында өзінің мамандығына деген сүйіспеншілікті арттыру, олардың өлкетану мен зерттеу саласындағы жетістіктерін насихаттау, ғылым мен техника саласы бойынша білім көкжиектерін кеңейту.
Шарада алғашқы болып сөз алған Айдар Садырбаев қазақстандық патриотизмді дамыту маңызды мәселе екенін айта келе, конференцияға қатысушыларға сәттілік тіледі. Өз кезегінде Радиотехника және байланыс колледжінің директоры Оралхан Сартаев Қадыр Тортаевтың өнегелі өмір жолынан сыр шертіп, көп жылдан бері колледж қабырғасында білім алып жүрген талантты жастарға қолдау жасап, Қадыр Тортаевтың ұрпақтары арнайы білім грантын тағайындайтынын атап өтті. Осы ретте кәсіби мамандарды дайындау ісіне көрсеткен қамқорлықтары үшін Тортаевтар отбасына Алғыс хат тапсырды.
Мұндай шараның жастар үшін патриоттық тұрғыдан тигізер пайдасы зор екенін айтады конференцияға қатысушы студенттер.
— Бұл конференцияның біздер үшін берері мол. Қадыр Тортайұлы сынды байланыс саласының білгір маманы, елінің патриоты болған азаматтың еңбек жолы мен өмір белестері біздерге үлгі-өнеге. Сонымен қатар конференция барысында қорғаған тақырыптарымыздың аясында бірқатар мәселелерді талқылап, шешілу жолдарын анықтап, тәжірибе алмастық, — дейді Қызылорда қаласынан келген студент Жоғары Нұрлыбек.
Әйгерім СӘРСЕНҒАЛИ,
«Семей таңы»
