Жастар орталығының ұйымдастыруымен Семей қаласының Шәкәрім атындағы мемлекеттік университетінде жоғары оқу орындары және колледж түлектерімен кездесу өткізілді.
{jcomments on}Жиынға жұмыспен қамту орталығы, «Даму» кәсіпкерлікті дамыту қоры, Тұрғын үй құрылыс жинақ банкінің өкілдері және қаламыздың жоғары оқу орындары мен колледж студенттері қатысты. Іс-шара барысында бірқатар бағдарламалар туралы түлектерге жан-жақты ақпарат берілді.
— Жастар орталығының басты мақсаты жастармен жұмыс жасау екені белгілі. Осы ретте орталық «Болашақ маман — 2015» атты ақпараттық түсіндіру жұмыстарын бастап отыр. Іс-шаралар аясында болашақ мамандарға мемлекеттік бағдарламаларды түсіндіретін боламыз. Бұл жұмыстар өз нәтижесін беретініне сенімдімін. Мәселен, өткен жылы қаламызда мемлекеттік «Жастар тәжірибесі» бағдарламасына 640 адам қатысқан. Ал несие алып, кәсібін бастаған 30 адамға 77 млн. 900 мың теңге көлемінде қаражат берілді. Біз алдағы уақытта осы көрсеткіштерді арттыруды көздеп отырмыз. Сол себепті жастар арасында ақпараттық-насихат жұмыстарын жүйелі жүргізуіміз қажет, — дейді Семей қаласы Жастар орталығының директорының міндетін атқарушы Қайсар Еркінбаев.
Оның айтуынша, оқуларын бітірген жастар жұмыс іздеп көп уақыттарын жоғалтып алады. Сондықтан жас мамандар осы бастан мемлекеттік бағдарламалармен танысып, өздеріне қолайлы жолдарды қарастырғандары дұрыс. Ал ақпараттық-насихат жұмыстары көктемге дейін жүргізіліп, қорытындысы жастардың жүмыс жәрмеңкесімен аяқталмақ.
Сондай-ақ, жиын барысында «Даму StartUp» жобасы, Тұрғын үй құрылыс жинақ банкінің, «Жұмыспен қамту жол картасы — 2020» бағдарламалары туралы да ақпараттық материалдар таратылды. Жастар да өздерін толғандырған сауалдарына жауап алды.
Асан МЫРЗАХАНОВ,
«Семей таңы»
