Semeytany.kz – Абай облысының әкімі Берік Уәли Құрылысшылар күніне арналған салтанатты жиынға қатысып, сала ардагерлері мен еңбек озаттарын кәсіби мерекемен құттықтады.
Шара барысында аймақ басшысы өңірдің әлеуметтік-экономикалық дамуына үлес қосқан құрылысшыларды марапаттап, олардың еңбегін жоғары бағалады. «Парасат» ордені Сәуле Досқұжановаға, «Құрмет» ордені Ахат Айтқазинге табысталды. Ал «Ерен еңбегі үшін» медалімен Қалқаман Бояубаев, Радик Сабитов және Азамат Хусаинов марапатталды. Сонымен қатар, саланың тағы 15 өкілі облыс әкімінің алғыс хаттарына ие болды.
Берік Уәли Мемлекет басшысы Қасым-Жомарт Тоқаевтың «Жұмыстың жаманы жоқ, кез келген еңбек – қадірлі» деген сөзін атап өтіп, өңірде салынып жатқан әлеуметтік, мәдени және өндірістік нысандардың сапалы әрі уақытында аяқталуы құрылысшылардың мінсіз жұмысына байланысты екенін айтты. Ол барлық сала мамандарына зор денсаулық, табыс және еңбекте толағай жетістіктер тіледі.
