Semeytany.kz – Абай облысының әкімі Берік Уәли облыс орталығындағы «Шығыс-Қазақстан ұн құрама жем комбинаты» АҚ-ның жұмысымен танысты. 1936 жылдан бері жұмыс істеп келе жатқан кәсіпорында бүгінде 381 адам еңбек етеді. Мұнда бидай ұнының барлық сұрыптары, кебек, құрама жем және макарон өнімдері шығарылады.
Биыл зауыт 112 671 тонна бидай ұнын, 27 606 тонна кебек, 6 900 тонна макарон және 52 800 тонна құрама жем өндіруді жоспарлап отыр. Жылдық қуаты – 144 450 тонна бидай өңдеу. Өткен жылы нысанда жаңғырту жұмыстары жүргізілсе, 2025-2029 жылдары диірмен мен құрама жем өндірісін ішінара жаңарту көзделген.
Алайда қазіргі таңда комбинат толық қуатта жұмыс істемей отыр. Элеваторда үшінші тарапқа тиесілі астық сақталуда. Осыған байланысты зауыт басшылығы облыс әкімінен қолдау сұрады.
Берік Уәли кәсіпорынның өңірдің азық-түлік қауіпсіздігіне қосып отырған үлесін атап өтіп, өндірісті толық жүктеу және жергілікті өнім көлемін арттыру қажет екенін айтты. «Бұл – облыс үшін маңызды нысан. Дайын инфрақұрылымы мен тәжірибелі мамандары бар. Негізгі мақсат – қуатты арттырып, ауыл шаруашылығы өнімдерін терең өңдеуге көшу. Бұл бағытта жүйелі қолдау көрсетеміз», – деді аймақ басшысы.
