Semeytany.kz – Абай облысының әкімі Берік Уәли ескі автогуж көпірінің жанында салынып жатқан жаңа көлік өткелінің құрылыс барысын тексерді. Ұзындығы 810 метр, ені 21,5 метр болатын нысанның құрылысы 2022 жылы Мемлекет басшысының тапсырмасымен басталған. 2022-2024 жылдары жобаны жүзеге асыруға 16,7 млрд теңге бөлінсе, биыл республикалық бюджеттен 10,3 млрд теңге қарастырылып, оның 5,5 млрд теңгесі игерілген.
Жобада 9 тірек орнату жоспарланған, қазіргі уақытта оның алтауы дайын. 9 мың тонна металл конструкцияның 2,5 мың тоннасы қойылды. Құрылысқа қосымша 19 млрд теңге қажет. Биылғы «Орталық Азия – Қытай» саммитінен кейін ҚХР тарапынан аймақ елдеріне қайтарымсыз грант бөлу жөнінде келісім жасалып, осы көпір құрылысына қаржыландыруды грант есебінен шешу ұсынысы Президент қолдауына ие болған.
Қазір нысанда 15 техника мен 120 жұмысшы екі ауысымда еңбек етуде. Құрылысты 2026 жылдың тамызында аяқтау жоспарланған. Әкім мердігерге жыл соңына дейін көпірдің бірінші кезеңін аяқтап, көліктердің жүруіне мүмкіндік жасауды тапсырды. Ал асфальт төсеу жұмыстары келесі жылдың көктемінде басталмақ.
