Сенбі күні облыс әкімі Даниал Ахметов Семейде болып, жұмыс сапары барысында Назарбаев зияткерлік мектебінің және Юность кентіндегі 1200 орындық мектеп құрылысының жұмыс қарқынын барып көрді. «№1 Семей ағаш өңдеу зауыты» ЖШС-нде болып, қалалық әкімдікте дербес бөлімдер мен мекемелердің және кәсіпорындар басшыларының қатысуымен жиын өткізді.
{jcomments on}Жұмыс сапарын өңір басшысы Юность кентіндегі мың екі жүз орындық мектептің құрылысымен танысудан бастады. Жобасы 2013 жылы тұңғыш сараптамадан өткен нысан құрылысының басталу уақытының кешеуілдеу себебін білу мақсатында аталған құрылыс алаңына бар-ған өңір басшысы кедергі келтіріп тұрған мәселелерді шешудің жолдарын қарастырып, тез арада жұмысты бастауды тапсырды.
Даниал Ахметов «№1 Семей ағаш өңдеу зауыт» ЖШС-нде болып кәсіпорынның жұмысымен танысты. Бұл өндіріс ошағының өкілдері облыс басшысына кейінгі уақытқа дейін электр қуатының жетіспеушілігі бол-ғанын айтты. Аталмыш мәселе шешімін тауып, қазіргі таңда жұмыс жалғасуда. Сонымен қатар кәсіпорын жұмысшылары өңір басшысына шығарылатын өнім түрлері мен өндіріс қуаты жайлы ақпарат беріп өтті. Зауыттағы жағдай жайлы мәліметке қаныққан облыс басшысы жұмыс қарқынын үдете түсу керектігін ескертіп, жүктелген тапсырманың орындалу барысын тексеру мақсатымен ағымдағы жылдың наурыз айында тағы да келетіндігін айтты.
Өңір басшысы құрылыста пайдаланылатын әртүрлі плиталар мен бетонның бірнеше түрлі маркасын шығаратын «Фирма «Азия» ЖШС-де де болды. Айта кету керек, аталмыш кәсіпорынның өнімдері бүгінде сұранысқа ие.
Облыс әкімі арнайы ат басын тіреген тағы бір нысан Қарағайлы ықшам ауданындағы салынып жатқан Назарбаев зияткерлік мектебі болды. Мердігер компанияның өкілі ғимарат құрылысының басым бөлігі аяқталуға жақын екенін жеткізді. Сонымен қатар өткен жылдың күзінде салына бастаған нысанды ағымдағы жылдың төртінші тоқсанында пайдалануға беру жоспарланып отырғанын айтты. Жалпы, Қарағайлы ықшам ауданында жиырма сегіз мыңдай адам тұрады деп көзделуде. Жоба бойынша көпқабатты тұрғын үйлер салу, оларға қажетті коммуникацияларды тарту жолдары толық қамтылған. Электр жарығымен қамтамасыз ету мәселесі де қарастырылған. Қарағайлы ықшам ауданына коммуникациялық желілер тарту бойынша жасалған жоба құны 2,2 миллиард теңгені құрайды деп күтілуде. Жалпы, жұмыстардың сапасы мен қарқынына көңілі толатынын жеткізген облыс басшысы бірқатар тапсырмалар жүктеді.
— Мұнда, міне, 550 мың шаршы метрге жуық тұрғын үй салынбақ. Бірінші кезекте осы ықшам ауданда тұрғын үй құрылысын жүзеге асыру керек. Бұл өз кезегінде үлкен мүмкіндіктер береді. Әрі қалаға да жақын. Сондықтан тағы да қайталап айтамын, биыл инфрақұрылымды толықтай жасап, келесі жылы көпқабатты тұрғын үйлер жұмысын осы жерде жүзеге асыру керек, — деді Даниал Кенжетайұлы.
Жұмыс сапары аясында облыс әкімі жаңа Жедел медициналық көмек көрсету стансасының құрылысымен де танысты. Қазіргі уақытта жұмыстардың басым бөлігі аяқтал-ған. Өңір басшысы қала әкімшілігі мен мердігер мекеме өкілдеріне құрылыс қарқынын арттырып, ағымдағы жылдың бірінші жартыжылдығында нысанды пайдалануға беру керектігін айтып, бірқатар нақты тапсырмалар жүктеді.
Сонымен қатар Даниал Ахметов жаңадан салынған Жедел медициналық көмек ауруханасында да болды. Мекеменің жұмысымен танысқан соң нысанның құрылысы барысында орын алған кемшіліктерді түзетуді міндеттеді. Бұл тұрғыда аурухана басшылығы мен қала әкімшілігіне бірқатар тапсырмалар берілді.
Жұмыс сапарының соңында облыс әкімі қала әкімдігіне ат басын бұрып, онда қаламыздың абаттандыру мәселелеріне арналған жиын өткізді, әкімдікте ұйымдастырылған абаттандыру жұмыстарында қолданылатын өнімдер көрмесін аралаған аймақ басшысы жергілікті өндірушілер тауарларының сапасына қанағаттанатынын жеткізді.
Жиын барысында бірінші кезекте қаламыздың Орталық алаңының абаттандыру мәселесі жайлы айтылды. Мәселен, жасыл желектің қай жерлерге егілетіні, көгалдандыру қалай жүргізілетіні сөз болды. Абай театры мен әкімшілік ғимаратының күндізгі және түнгі уақыттағы безендірілуінің жобасы облыс әкімінің назарына ұсынылды. Жалпы, бұл бағыттағы атқарылған жұмысқа оң баға берген Даниал Ахметов дайын нұсқаға байланысты пікірін білдіріп, ойын айтты. Сондай-ақ жиын барысында орталық алаңда жаңа субұрқақ жасалатыны туралы сөз болды. Жаңарғаннан кейін ол су бүркіп қана қоймай, әртүрлі жарық шашып тұратын әуенді фонтан болмақ. Осы орайда субұрқақты жарық шашатын құрылғылармен қамтамасыз ететін ресейлік «Фонтанград» компаниясының өкілі Виктор Бублик жаңарған субұрқақтың қандай жарық шашатынын және оны қандай ырғақпен істейтінін айтып, жан-жақты таныстырылым жасады. Ақпаратты тыңдап болғаннан кейін мердігер мекеме өкіліне тапсырма берілді.
— Жобаға қатысты барлық техникалық сұрақтардың шешімін тауып, мамыр айында құрылыс алаңына шығып, жұмысты бастау керек. Мамырдан бастап шілдеге дейінгі аралықта барлық жұмыстар аяқталып, қала тұрғындары жаз айларында жаңа субұрқақты тамашалау мүмкіндігіне ие болулары керек. Сондықтан алдағы төрт ай ішінде дайындықты жетілдіруге тиіссіздер,- деді Даниал Кенжетайұлы.
Қазіргі таңда Абай көшесі мен Шәкәрім даңғылының қиылысында көлік кептелісінің жиілей бастағаны белгілі. Қаладағы автокөлік жүргізушілері үшін ыңғайсыздық тудырып жүрген бұл мәселені шешу мақсатында отырыс барысында осы жерде айналма жол салу туралы ұсыныс айтылып, өңір басшысына арнайы сызбанұсқасы көрсетілді. Мәліметке қанығып, маңыздылығына көз жеткізгеннен кейін облыс әкімі ұсынысты мақұлдап, жобалық-сметалық құжаттаманы әзірлеуге кірісуді тапсырды.
Отырыс барысында Даниал Ахметов Семей қаласының өткені еліміздің тарихында елеулі орын алатынын тілге тиек етіп, осы орайда шаһардың сәулет тұрғысынан ерекше болуына баса назар аудару керектігін айтты.
— Біріншіден, не істеуге тиіспіз? Нендей дүние жетпейді? Семей қаласы небәрі он төрт миллион теңгенің гүлін еккен. Бұл өте аз. Сондықтан мен бұл санды ағымдағы жылы жүз миллионға жеткізуді тапсырамын. Осы орайда ескерерлік дүние — еліміздің басқа аймақтарынан әкелінген емес, осы Семейдегі көшеттерде өсірілген жасыл желекті егуіміз керек, — деді Даниал Кенжетайұлы.
Облыс әкімі сондай-ақ орталық алаңды абаттандыру жұмыстарының жобалық-сметалық құжаттамасын әзірлеуге қосымша тағы үш жүз миллион теңге, кредиторлық қарыздарды төлеуге алты жүз миллион теңге бөлінетінін атап өтті. Қала әкімдігіне орталық алаңды абаттандыру бойынша құрылыс жұмыстарын ағымдағы жылдың мамыр айында бастауды тапсырды. Мемлекеттік-жекеменшік серіктестік аясында бес балабақша салу мәселесін де назардан тыс қалдырмады. Бұл жұмыстарды жүзеге асыруға жергілікті кәсіпкерлерді тартуды жүктеді.
— Қазіргі таңда Семей қаласының қажетін шешу мәселесіне көп көңіл бөлінуде. Қаржының да көлемі жеткілікті. Тек жергілікті билік қалада іске асырылатын әрбір жобаға мұқияттылықпен қарап, белсенділік танытуы керек,- дей келе, облыс басшысы сөзін ары қарай жалғастырды. — Ақпан айында сессия өткізіліп, тұрғын үй құрылысы саласында «Тұрғын үй құрылыс жинақ банкімен» кооперация үшін қосымша екі миллиард теңгеге жуық қаражат бөлінеді. Сіздерден осы уақыт ішінде құрылыс алаңдарын және құрылыс жұмысын жүргізетін мердігерлерді анықтау талап етіледі.
Жиын соңында облыс әкімі әрбір жобаны жан-жақты таразылаған соң ғана жүзеге асыруды қолға алу керектігін тағы бір мәрте еске салып, қаланы абаттандыру мен құрылыс жұмыстарын жүргізуге қатысты нақты тапсырмалар жүктеді.
Мирас ҚҰСАЙЫН,
«Семей таңы»
