Semeytany.kz — Облыс әкімі Берік Уәли қаладағы Арнаулы әлеуметтік қызметтер көрсету орталығының жұмысымен танысып, мекемеге балаларды тасымалдауға арналған жаңа автобустың кілтін табыстады.
Орталықта 385 қызмет алушыға арнаулы әлеуметтік көмектің 8 түрі көрсетіледі: әлеуметтік-тұрмыстық, медициналық, психологиялық, педагогикалық, еңбек, мәдени, экономикалық және құқықтық қолдау. Оның ішінде 345 адамға қызмет үй жағдайында көрсетілсе, психоневрологиялық патологиясы бар 40 бала күндізгі бөлімшеде қамтылған. Қосымша 19 бала кезекте тұр.
Мекемеде 129 адам жұмыс істейді: 64 әлеуметтік қызметкер, 20 педагогикалық маман, 6 медицина қызметкері және өзге де қызметкерлер. Орталық директоры Рымжан Тынысова ғимараттың жалға алынатынын айтып, бұл мәселені шешуге жәрдем сұрады.
Берік Уәли аталған мәселеге назар аударып, қала әкімінің міндетін атқарушы Бекжан Бапышевқа ұсыныс әзірлеуді тапсырды. «Үлкен сауапты іс атқарып отырсыздар. Ерекше балалармен жұмыс істеу ерекше төзім мен қажырлықты қажет етеді. Балаларды тасымалдауда қиындық туындамас үшін осы автобусты беріп отырмыз. 16 жастан асқан азаматтарға да арнайы орталықтар салу қажет, бұл бағыттағы жұмыстар жан-жақты қаралатын болады», – деді облыс әкімі.
Жаңа көлік орталықтың тасымал қызметін жеңілдетіп, балалардың қауіпсіздігі мен қолжетімділігін арттыруға ықпал етеді. Ғимарат мәселесі бойынша нақты шешімдер пысықталмақ.
