Semeytany.kz – Облыс әкімі Берік Уәли Қарағайлы ықшам ауданында салынып жатқан жаңа саябақтың құрылыс барысын қарап, нысанды қала күніне дейін аяқтауды тапсырды.
Әкім мердігерге жұмыстың сапасын қадағалап, әкелінген ағаштарды уақтылы суарып отыруды міндеттеді. «Бұл маңдағы тұрғындар үшін жайлы демалыс орны болуы керек. Жұмысты жандандырып, қала күніне дейін пайдалануға берейік», – деді аймақ басшысы.
Жалпы аумағы бес гектар болатын саябақта серуен жолдары, сахна, мәдени-көпшілік іс-шараларға арналған алаңдар, демалыс аймақтары мен шағын сауда орындары қарастырылған.
Қазіргі таңда көгалдандыру, тас төсеу және жарық бағандарын орнату жүріп жатыр. Саябаққа жеткізілген 2 мың түп қарағайдың 500-і отырғызылған, жұмыстардың 50 пайызы орындалды. Мердігер компания нысанды қала күніне дейін аяқтауға уәде берді.
