Semeytany.kz — Абай облысының әкімі Берік Уәли Жаңасемей ауданының Озерки ауылында бой көтеріп жатқан ағаш өңдеу комбинатының құрылысына барып, барысымен танысты.
Индустриялық-инвестициялық нысанның аумағы 52 гектар. Құрылысы 2025 жылдың шілдесінде басталған жобаның құны – 9 млрд 580 млн теңге. Қазір алаңда 50 адам еңбек етсе, кәсіпорын іске қосылғанда 120 тұрақты жұмыс орны ашылады. Аймақ басшысы инвесторлармен кездесуде жобаның өңір экономикасы мен экспорт әлеуетін арттыруға қызмет ететінін атап өтті.
Кәсіпорында ағаш-жоңқалы плита (АЖП), ламинатталған ағаш-жоңқалы плита (ЛАЖП), түйіршік (пеллет) және OSB өнімдері шығарылады. Комбинатты 2026 жылдың үшінші тоқсанында пайдалануға беру жоспарланған.
Жоба жүзеге асқанда өңірде жаңа өндіріс пайда болып, жергілікті тұрғындар жұмыспен қамтылады. Сонымен бірге ағаш өнімдерін ішкі нарыққа тұрақты жеткізуге және экспортқа шығаруға мүмкіндік туады.
