Semeytany.kz — Бородулиха ауданының Зенковка ауылында жаңа өрт сөндіру бекеті іске қосылды. Нысан ауданның 2304 тұрғыны бар жеті елді мекенін өрттен қорғауға және төтенше жағдайларға жедел үн қатуға мүмкіндік береді.
Ашылу рәсімінде аудан әкімі Айдар Ибраев ғимараттың бой көтеруіне атсалысқан Поптар отбасына алғыс айтты. Оның сөзінше, жергілікті қауымдастықтың қолдауы ауыл инфрақұрылымын нығайтуға елеулі серпін беріп отыр.
Облыстық Төтенше жағдайлар департаментінің басшысы Манарбек Шапағатов жаңа бекет өрт сөндірушілердің жету уақытын қысқартып, әрекет ету тиімділігін арттыратынын атап өтті. «Биыл облыста 834 өрт тіркелді, оның жартысына жуығы тұрғын үй секторында болды. 200-ден астам табиғи өрт оқиғасы анықталды», — деді ол.
Қоғам белсендісі Константин Поп бұған дейін хоккей кортын, пошта ғимаратын және өзге де әлеуметтік нысандардың құрылысына жәрдемдескен. Лентаны қиюдан кейін тұрғындар жаңа техника мен жабдықтарды көрді. Жыл соңына дейін Андреев, Дмитриевка және Петропавл ауылдық округтерінде де осындай бекеттер ашу жоспарланып отыр.
