Semeytany.kz — Абай облысында 2025–2026 жылдардағы жылыту маусымына дайындық қарқыны күшейді. Үкімет отырысында облыс әкімі Берік Уәли Семей, Аягөз және өңірдегі өзге елді мекендер бойынша атқарылып жатқан жұмыс пен нақты мерзімдерді баяндады.
Семей қаласын жылумен №1 ЖЭО және 19 қазандық қамтамасыз етеді. Қазіргі таңда 19 қазандықтың 13-і толық дайын. Қалған алтысында (соның ішінде резервтік қондырғыларда) жөндеу-қалпына келтіру жұмыстары 25 қыркүйекке дейін толық аяқталады.
Аягөз қаласында 7 қазандық бар, соның 6-ы маусымға әзір. «Орталық» қазандығында 4,4 гигакалория/сағ қазандар 10 гигакалория/сағ агрегаттарға ауыстырылып жатыр. Нәтижесінде қазандықтың жалпы қуаты 9,5-тен 30 гигакалория/сағ дейін өседі және қосымша шамамен 400 абонент орталық жылуға қосылады. Бірінші жылыту қазаны 20 қыркүйекке дейін, ал екінші (резервтік) қазан 15 қазанға дейін іске қосу жоспарланған.
Жөндеу жұмыстарына қаржыландыру бірнеше көзден қарастырылған: Үкімет резервінен 3 млрд 800 млн теңге бөлінді (оның ішінде Семейге – 2,3 млрд теңге, Аягөзге – 1,4 млрд теңге). Бұған қоса облыстық бюджеттен 2 млрд 600 млн теңге бағытталуда.
Өңірде орталықтандырылған жылумен 3 қала және 5 аудан қамтылған: Семей, Курчатов, Аягөз қалалары; Жарма ауданы (Шуақ ауылы, Әуезов кенті), Бородулиха ауданы (Бородулиха ауылы, Жезкент кенті), Жаңасемей ауданы (Шүлбі кенті), Абай ауданы (Қарауыл ауылы), Үржар ауданы (Үржар ауылы). Қазіргі басты міндет — нысандардың дайындығын мерзімінде аяқтап, алдағы маусымда жылудың тұрақты берілуін қамтамасыз ету.
