Semeytany.kz – Семей қаласындағы «Арена» спорт кешенінде Абай облысы әкімінің кубогына арналған халықаралық бокс турнирі жалауын көтерді.
Жарысқа Австралия, Моңғолия, Өзбекстан, Қырғызстан елдерінен және Қазақстанның 11 өңірінен жүзге жуық спортшы қатысып жатыр. Рингке Әлем кубогының иегерлері, сондай-ақ U-22 және ересектер арасындағы Азия чемпионаттарының жеңімпаздары мен жүлдегерлері шығады.
Ашылу салтанатында облыс әкімі Берік Уәли, Қазақстан бокс федерациясының вице-президенті, Сидней Олимпиадасының күміс жүлдегері Мұхтархан Ділдәбеков, бокстан әлем чемпионы Біржан Жақыпов, федерацияның бас хатшысы Мерей Ақшалов және Абай облысы әуесқой бокс федерациясының президенті Махат Төрәлі болды.
Аймақ басшысы сөзінде Мемлекет басшысы Қасым-Жомарт Тоқаевтың «бокспен тек рухы мықты адамдар шұғылданады» деген бағасын еске алып, өңір жастарының шеберлігін шыңдап, халықаралық аренадағы бәсекеге қабілеттілігін арттыруға басымдық беріліп отырғанын айтты. 2025 жылғы мамырда Шри-Ланканың Коломбо қаласында өткен Азия чемпионатында абайлық боксшылардың жақсы нәтиже көрсетуі соның дәлелі екені атап өтілді.
Турнир 10 салмақ дәрежесін қамтиды. Жалпы жүлде қоры – 10 млн теңге. Жеңімпаздар мен жүлдегерлерге кубок, медаль және бағалы сыйлықтар табысталады.
