Үшінші ақпан күні Курчатов қаласының әкімі Нұрбол Нұрғалиев халықпен есептік кездесуін өткізді. Жиын барысында 2014 жылдың қорытындысы бойынша әлеуметтік-экономикалық даму көрсеткіштері және атқарылған жұмыстар жайлы ақпарат берілді. Сонымен бірге тұрғындар өздерін толғандырған мәселелерге қатысты сұрақтар қойып, жауаптар алу мүмкіндігіне ие болды.
{jcomments on}Кездесуге қаладағы орта және шағын бизнес өкілдері, ядролық технологиялар кәсіп-орындарының, қалалық емхананың, 3514 әскери бөлімі мен өрт сөндіру бөлімінің қызметкерлері және қала тұрғындары қатысты. Курчатов қаласының әкімі Нұрбол Нұрғалиев 2014 жылы жүзеге асырылған шаруалар жайлы айтты. Сондай-ақ ол өз есебінде 2015 жылға арналған жұмыс жоспары мен «Нұрлы жол — болашаққа бастар жол» атты Жолдау аясында қолға алу межеленген жұмыстар туралы ақпарат берді.
Уақыт өте келе қала халқын толғандыратын сұрақтардың мазмұны мен тақырыбы өзгеруде. Бұған кездесу барысында айтыл-ған сөздер дәлел бола алады. Бұрын тұрғын үй-коммуналдық шаруашылығы саласындағы мәселелер қозғалса, қазіргі таңда тұрғындар туған қаласына деген сүйіспеншілікке тәрбиелеу жайына қатысты бастамалар көтеруде.
Әлбетте, кездесу барысында қала халқы үшін маңызды салаларға байланысты мәселелер де назардан тыс қалмады. Мәселен, тұрғындар балабақша құрылысының қашан басталатыны, «Семей Курчатов» автокөлік жолының қашан жөнделетіні жайлы сауалдар қойды. Бұдан бөлек қала халқы абаттандыру мен көгалдандыру жұмыстарының, медициналық қызмет түрлерінің, маршруттық таксилер қызметінің сапасы жайлы, коммуналдық қызметтердің жұмысындағы олқылықтар туралы сөз қозғап, балалар мен жасөспірімдер спорт мектебін жөндеуден өткізу мәселесін көтерді.
Нұрбол Жолдасбекұлы кездесу барысында өзіне қойылған барлық сұрақтарға егжей-тегжейлі жауап берді. Басқосуға қатысушыларды қаланы көркейтіп, дамытуға бір адамдай атсалысуға шақырды. Ал тұрғындар қала әкімінің көтерген бастамаларына қолдау көрсететіндіктерін айтып, алдағы уақытта атқарар жұмысының жемісті болуына тілектестіктерін жеткізді.
Мирас ҚҰСАЙЫН,
«Семей таңы»
