Қарауылдың қақ ортасында құйылған мұз айдыны ауыл жастарының, мектеп оқушыларының денсаулықтарын шыңдап, уақыттарын көңілді өткізетін таптырмас демалыс мекені болып тұрғанына бірсыпыра уақыттың жүзі болды. Жуырда осы мұзайдында допты хоккейден Абай ауданының дене шынықтыру және спорт бөлімінің ұйымдастыруымен Жеңістің 70 жылдығына арналған ересектер арасындағы аудандық жарыс болып өтті.
{jcomments on}Қарауыл мұзайдынына жиналған ауыл жастары сол күнгі ызғарлы желді де елемеді. Жарысқа тыңғылықты дайындалып, қыздырынып, жаттығып жүрген оларға қараудың өзі бір ғанибет. Міне, жас спортшылардың асыға тосқан сәті де келіп жетіп, аудан әкімінің орынбасары Марат Еділбаев аудан жастары арасындағы допты хоккей жарысын ашық деп жариялады. Қамшы салдырмас жүйріктердің бәсекеге толы кездесулерін тамашалауға келген жанкүйерлердің қарасы да көп.
Жарыс екі топқа бөлініп өткізілді. Ересектер арасында өткен бәсекеге 8 команда қатысты. Екі күнге созылған сайыстарда электр жүйесі мекемесінің, Абай атындағы мектеп-лицейдің, Қарауыл гимназиясының, балалар мен жасөспірімдер спорт мектебінің және Көкбай, Құндызды, Кеңгірбай би, Саржал ауылдарының командаларының ойыншылары тартысты ойын өрнектерімен тәнті етті. Нәтижесінде үздік ойындарымен шеберліктерін танытқан төмендегі командалар жүлделі орындарға ие болды. Төрешілер алқасының шешімі бойынша I орынды Кеңгірбай би ауылының командасы, II орынды спорт мектебінің ұжымы, III орынды электр жүйесі мекемесінің тарландары жеңіп алды. Айшықты ойындар сәтінде III орынды алуға ұмтылған Құндызды ауылы мен электр жүйесі командасы арасындағы қызу бәсеке тартысты да қызықты өрбіді. Екі таймда да командалар тең ойнады. Қос команда тең түскендіктен, қосымша 5 минут уақыт беріліп, екі таймда тағы да тең түсті. Ақыр соңында екі команда бір — біріне пенальти соғып, 3:2 есебімен электр жүйесі мекемесі спортшыларының мерейі үстем болды.
Ойын барысында ерекше өнерімен көзге түскен спортшылар арнайы тағайындалған марапаттауларға ие болды. «Үздік қақпашы» атағына электр жүйесі мекемесінен Қ.Муслиманов, «Үздік ойыншы» атағына спорт мектебінің ойыншысы, атақты спорт ардагері Б.Хаметов, «Үздік қорғаушы» болып спорт мектебі командасынан А.Қадыров танылса, «Үздік шабуылшы» ретінде құндыздылық Ж. Әнуарұлы мадақталды. Жарыс жеңімпаздары аудандық дене шынықтыру және спорт бөлімінің мадақтамаларымен және бағалы сыйлықтарымен марапатталды. Алдағы уақытта да ауыл жастарының салауатты өмір салтына деген құлшыныстарын арттыратын осындай жарыстар жалғасын таба бермек.
Бұлбұл ӘНУАРБЕКҚЫЗЫ,
“Семей таңы”
