Semeytany.kz — Абай облысының әкімі Берік Уәли Үржардағы балаларға арналған арнайы әлеуметтік қызмет көрсету орталығына барып, мекеменің жай-күйімен және қосымша корпус құрылысының барысымен танысты. Аймақ басшысы мердігерге жұмысты жауапкершілікпен атқарып, нысанды белгіленген мерзімде аяқтауды тапсырды.
Сапар барысында облыс әкімі балалардың өнерін тамашалап, орталыққа интерактивті тақтаның сертификатын табыстады. Балалар өз қолдарымен жасаған қолөнер бұйымдарын сыйға тартты.
Бұл орталық 2011 жылы пайдалануға берілген. Мұнда тірек-қимыл аппараты мен психоневрологиялық ақаулары бар 3–18 жас аралығындағы 56 балаға стационар және жартылай стационар режімінде арнайы әлеуметтік қызметтер көрсетіледі. Топтар ақыл-ес даму деңгейі мен жас ерекшелігіне қарай 6 бағытқа бөлінген, 29 педагог еңбек етеді. Қызмет көрсету стандарты бойынша 8 түрлі әлеуметтік қызмет ұсынылады.
Мекемеде шешімін қажет ететін мәселелер бар: медициналық блок пен асхана қазіргі ғимараттан 170 метр қашықта орналасқан. Әсіресе күз-қыс мезгілінде балалардың сыртқа шығып тамақтануы мен медициналық көмек алуына қолайсыздық туып, көктайғақта жарақат қаупі жоғарылайды. Осыны ескере отырып, 2023 жылы орталық жанынан қосымша екі қабатты корпус салу басталған. Нысан іске қосылған жағдайда қамтылатын балалар саны 70-ке дейін артады.
Берік Уәли құрылыс барысын аралап, мердігерге кемшіліктерді жоюды қатаң ескертті. Бұған дейін облыстық мемлекеттік сәулет-құрылыс бақылауы бірқатар ақауларды анықтаған. Құрылыс басқармасына жұмысты тұрақты бақылауда ұстап, ғимаратқа қажетті қосымша құрылғылар орнату жөнінде ұсыныстар әзірлеу тапсырылды.
