Аудандық Мәдениет үйінде Өнер мектебінің директоры, Бесқарағай ауданының Құрметті азаматы, жергілікті сазгер Нұрғазин Қайлаш Баймақұлының 65 жылдық мерейтойына орай жеке шығармашылық кеші өтті.
{jcomments on}Өнер иесінің шығармашылық кешіне аудан әкімі Нұрлан Сыдықов бастаған жергілікті билік өкілдері арнайы келді. Сол сияқты сазгердің отбасы мен туған-туыстары, әріптестері, достарымен қатар, жерлестері де кешке көптеп жиналды. Ауданның мәдениет саласын дамытуға өзіндік үлес қосып, біршама әндерге әуен жазып, жерлестерінің мақтанышына айналған Қайлаш Баймақұлының еңбегі бүгінгі таңда ескерусіз қалмады.
Кеш шымылдығы сазгердің 16 жасында жазған «Встреча Серпантины» атты алғашқы әнімен ашылды. Сонымен қатар кеште өнер иесінің өмірбаяны, отбасы, қызметтегі жетістіктері слайд және бейнероликтер арқылы көрсетіліп отырды. Кеш барысында көрермен қауымға Өнер мектебінің балалар хоры мен вокалдық тобының орындауында «Анашым», «Край родной, Иртыш балапан» әндері ұсынылса, бұдан басқа «Әкеме», «Домбыра», «Осеняя» романсы, «Девушка Востока», «Уезжает» сынды әндері де көпшілік көңілін серпілтті.
Сондай-ақ жиналған жұртшылық сазгердің шығармашылық кешінде сахна төріне шығып, «Ауылым, Есілім Ертісім» әнін С.Құсмановтың, «Руки матери» әнін Г.Баюннің орын-дауында тыңдаса, «Военная тема» атты гармоншы балладасы мен баяншылар ансамблінің кешке арнаған тартуларын да қошеметпен қабылдады. Сол сияқты «Семейім», «Огни Усть-Каменогорска» әндерін Баталовтар дуэті нақышына келтіре шырқаса, «Қайдасың?» әнімен ортаға шыққан Ә.Жұмағазина көпшілік көзайымына айналды. Вокалдық топтың орындауындағы «Мой Восточный Казахстан», «Доброе утро, мой Казахстан» сынды әндер де шығыс өңіріне таралып үлгерген еді. Бұл кештің ең басты жемісі атанған, дәл осы сәтте жаңадан тұсауы кесілген «Первый дождь», «А жизнь как море» атты сазгердің заманауи әндерін өнер мектебінің дарынды оқушысы А.Байбосынова орындады. Жаңа әуендердің көрермен көңілінен шыққандығы олардың ыстық ықыласынан анық байқалды. Шығармашылық кеш Бесқарағай ауданының әнұранына айналған «Бесқарағай» әнімен аяқталып, әнді қосыла шырқаған бесқарағайлықтар сазгердің өнеріне бас иіп, өзіндік шығу тарихы бар әр әуенін сүйіп тыңдап, ризашылықтарын қошеметпен жеткізді.
Кеш соңында Қайлаш Баймақұлының өнерін бағалап, қуанышымен ортақтаса келген аудан әкімі Нұрлан Бәтташұлы Сыдықов көпшілік алдында өнер иесіне деген жылы лебізін білдіріп, иығына шапан жауып, құрмет көрсетті. Сонымен қатар ШҚО әкімінің қоғамдық көмекшісі В.Козинский, білім беру бөлімінің басшысы К.Тастенбекова, ішкі саясат, мәдениет және тілдерді дамыту бөлімінің, Мәде-ниет үйінің, Өнер мектебінің ұжымдары мерейтой иесіне жүректен шыққан ақ тілектерін арнады.
Әке жолын ардақ тұтып, өмірін өнерге арнаған Қайлаш Баймақұлы Нұрғазиннің бесқарағайлықтарды әлі талай әсерлі әндерімен қуантары сөзсіз. Сазгерге шалқар шабыт, еңбегіне жеміс, отбасына қуаныш пен шаттық тілейміз.
Әсел ҚАСЫМҒОЖИНА,
«Семей таңы»
