Ақпанның алтысы күні қала әкімінің орынбасары Зәуреш Исабаева «Нұр Отан» партиясы Семей қалалық филиалында қоғамдық қабылдау өткізіп, тұрғындардың түрлі салалар бойынша сауалдарына жауап берді. Толғандырған мәселелерінің шешу жолдары мен қандай мекемелерге жүгіну керектігі жайлы айтты.
{jcomments on}Қабылдау кезінде қала әкімінің орынбасарына бірінші болып өзінің жеке сұрағын Қамария Әділбаева есімді тұрғын қойды. Бала кезінде ауыр жарақат алып, оң аяғына екі рет ота жасатқанын айтқан ол қазір жасы алпысқа таяғанын тілге тиек етіп, одан бері қырық бес жылға жуық уақыт өткенін жеткізді. Кейінгі кездері екінші аяғы қатты ауыра бастаған көрінеді. Ота жасауды қажет етеді. Осы орайда Қамария Еркінбекқызы өзі тұратын Шығыс кентіндегі емхананың мамандары кезекті ұзақ күтуге тура келетіндігін айтқан. Сырқаты жанына батқан тұрғынның тілегі – ота жасатуға квота бөлу мәселесін шешу. Мүмкін болса, ота жасауды жылдамдату жағын қарастыруды өтінді.
Тұрғынның сұрағын мұқият тыңдап алғаннан кейін қала әкімінің орынбасары Зәуреш Исабаева Шығыс Қазақстан облысы денсаулық сақтау басқармасы Семей қаласы бойынша бөлімінің бас маманы Светлана Вакуленкоға арнайы тапсырма берді. Мәселенің жылдам шешілуін жеке бақылауында ұстайтынын жеткізді. Ота жасатуға квота бөлудің жай-жапсары туралы мынадай ақпарат берді:
— Тұрғылықты мекенжайыңыз бойынша бекітілген емханаңызда істейтін арнайы маманға барсаңыз, ол сізді кезекке тіркеп қояды. Өскеменге жаздырса, кезек ұзақтау болады, сондықтан Астана немесе Алматы қаласының арнайы ауруханаларына тіркетіп қоямыз. Жарты жылдың ішінде аяғыңызға жасалатын отаның кезегі келеді,- деді Зәуреш Рамазанқызы.
Қоғамдық қабылдауға келген Мәрзия Омашева есімді тағы бір тұрғын он төрт жасынан бастап еңбекке араласып, алпысыншы жылдардың соңынан тоқсаныншы жылдарға дейін сол кездегі «Большевичка» фабрикасында жұмыс істегенін айтты. Өзінің мамандығы бойынша жеткен жетістіктері үшін талай марапаттарға да ие болған көрінеді. Алайда қазіргі уақытта тарқап кеткен фабриканың орнында құрылған «Мирас» кәсіпорнының басшылығы тарапынан Ардагер ретінде көңіл бөлінбейтінін жеткізді.
Тұрғынның өтінішін тыңдағаннан кейін қала әкімінің орынбасары бұл мәселені қалалық Ардагерлер кеңесінің басшылығымен бірлесіп шешуге уәде берді. Мәрзия Шамшиярқызын және онымен бірге келген жұбайын ардагер, аға буын өкілі ретінде ағымдағы жылы тойланатын мерейтойларды атап өтуге үлес қосуға шақырды. Шараларға қатысса, нұр үстіне нұр боларын да тілге тиек етті.
Мәрзия Шамшиярқызын толғандырған екінші сұрақ тұрғылықты мекенжайы бойынша бекітілген емханасында көрсетілетін медициналық қызмет түрлерінің сапасы жайында болды.
— Дәрілерді өзіміз сатып аламыз. Бірақ оларды еккізіп, ем қабылдайтын орын болмай тұр. Үшінші емханада ондай қызмет түрлері ақылы екенін айтады. Тым болмаса, күндіз жатып ем қабылдайтын жер болса. Осы жағын қарастырсаңыздар, — деді өз сөзінде қала тұрғыны. Қала әкімінің орынбасары Шығыс Қазақстан облысы денсаулық сақтау басқармасы Семей қаласы бойынша бөлімінің бас маманы Светлана Вакуленкоға бұл мәселені де шешу туралы тапсырма берді.
Жалпы, қоғамдық қабылдау барысында жұмыспен қамту, зейнетақы төлеу, баспанамен қамтамасыз ету және тағы да бірқатар мәселелер бойынша сауалдарын қойған тұрғындар жан-жақты жауаптар алды.
Мирас ҚҰСАЙЫН,
«Семей таңы»
