Ақпан айының алтысы күні ел аумағында Қазақстан халқы Ассамблеясы жылының ресми ашылуына арналған ауқымды синхрон-акция өтті. Шара аясында Семей қаласының Достық үйінде де салтанатты жиын ұйымдастырылды. Бірлік пен берекені нығайтуда ерекше қызмет атқарып келе жатқан қоғамдық институт — Қазақстан халқы Ассамблеясы жылының ашылуына арналған басқосуға қала әкімінің орынбасары Зәуреш Исабаева, Достық үйінің директоры Аман Тілеубаев, ұлттық-мәдени бірлестіктер мүшелері, зиялы қауым өкілдері қатысты.
{jcomments on}Салтанатты шара барысында бірінші болып сөз алған қала әкімінің орынбасары Зәуреш Исабаева жиналған қауымды Қазақстан халқы Ассамблеясы жылының басталуымен құттықтады. Қазақстан халқының бірлігі мен татулығы ынтымақты нығайту мен отансүйгіштіктің нақты көрінісі екенін атап өтті. Ұлтаралық келісімнің баға жетпес құндылық болып табылатынын тілге тиек етті.
— Қазақстан Республикасының Президенті Нұрсұлтан Әбішұлы Назарбаевтың саясатын қолдай білген барлық ұлт пен ұлыстың өзара ықпалдастық, еліміздің өркендеуі жолындағы табанды еңбегінің арқасында отанымыз дамудың даңғыл жолына түсті. Елбасының жарлығымен жиырма жыл бұрын құрылған Қазақстан халқы Ассамблеясы өзінің өміршеңдігін толыққанды дәлелдеуде. Қазақстан Республикасы «Бір халық, бір ел, бір тағдыр» ұранымен өркендеу жолына түсті. Бір халық – бұл барлығымыз үшін ортақ ұлттық мүдделер. Бір ел – ол барлығымыз үшін ортақ отан. Бір тағдыр – бұл бірге жүріп өткен қиындықтар мен жеңістер, бұл — біздің ортақ келешегіміз, игілікті және өсіп-өркендеген Қазақстан, — деді қала әкімінің орынбасары.
Сондай-ақ Зәуреш Рамазанқызы өз сөзінде стратегиялық бағыттан ауытқымай, «Нұрлы жол» бағдарламасын табысты жүзеге асыру үшін қоғамның тұрақтылығы аса қажет екенін атап өтті. 2015 жыл ұлттық тарихымызды ұлықтау тұрғысынан Қазақ хандығының 550 жылдығын, Қазақстан Республикасының Конституциясының және Ассамблеяның жиырма жылдығы, Жеңістің 70 жылдығы, Ұлы Абайдың 170 жылдығы сияқты мерейлі даталармен айшықталып отырғанын тілге тиек етті. Барлық ұлт өкілдерін осынау мерейтойларды атап өтуге белсене қатысуға шақырды.
Салтанатты шара барысында көрермендер назарына Достық үйінің құрамында жұмыс істеп жатқан ұлттық-мәдени орталықтардың мүшелері әзірлеген арнайы концерттік бағдарлама ұсынылды. Өнерпаздар ән шырқап, би билеп, жиналған қауымға шат-шадыман көңіл күй сыйлады. Сондай-ақ шара барысында әртүрлі ұлттардың салт-дәстүрінен, тұрмыс-тіршілігінен хабар беретін бұйымдар, заттардан құралған көрме ұйымдастырылды.
Қазақстан халқы Ассамблеясы жылының басталуы күні шараға қатысушы қауым бір-біріне жылы лебіздерін арнап, құттықтау-тілектерін айтып жатты. Солардың бірі — «Айша-Бибі» мәдени орталығының жетекшісі Айман Бокбасарова. Өзінің құттықтау сөзінде ол Қазақстан халқы Ассамблеясының қоғамдағы татулық пен келісімді нығайтудағы ролі туралы айтып өтті.
— Жиырма жыл бұрын, яғни 1995 жылы, Ассамблея құрылды. Мақсаты бәрімізге белгілі – көпұлтты елімізде ұлтаралық татулықты нығайтып, барша халықтың жарасымды ғұмыр кешуін қамтамасыз ету. Бүгінгі таңда бұл мақсат толық орындалып келеді деп ойлаймын. Мысал ретінде келтірсем, оған біздің қаламыздағы барлық ұлт өкілдерінің бір-бірінің мерекелерін бірге тойласып, ұйымдастырған шараларының жақсы деңгейде өтуіне атсалысуы дәлел бола алады. Мұндай жағдай тек мереке кездерінде ғана емес, күнделікті өмірде де сақталуда. Бұл- біздің басты жетістігіміз. Бүгінгі Қазақстан Халқы Ассамблеясы жылының бастау алуымен барлық ұлт өкілдерін шын жүректен құттықтаймын! Ассамблеяның жұмысты жемісті болсын,- деді Айман Ибрайқызы.
Шешен-ингуш мәдени орталығының өкілі Сұлтан Цумаев та Қазақстан халқы Ассамблеясының қоғамдағы береке-бірлікті сақтауда, нығайтуда, дәріптеуде үлкен рөл атқаратын маңызды институт екенін атап өтті.
— Әлем елдері Қазақстаннан үлгі алуы тиіс деп ойлаймын. Тату-тәтті өмір, жер бетінде бейбітшілік орнасын. Еліміздегі достық пен ынтымақ-береке сақталсын. Мемлекетіміз өркендеп-өсе берсін. Халқымыз аман, жұртымыз тыныш болсын, — деді өзінің құттықтау сөзінде Сұлтан Цумаев.
Қазақстан халқы Ассамблеясы жылының басталуымен украин ұлттық-мәдени орталығы төрағасының орынбасары Алла Тригуб та құттықтап, әлемде баламасы жоқ қоғамдық институттың жұмысы жайлы өз ойын айтты.
— Ассамблеяның негізін қалап, осындай ұйымның жемісті жұмыс істеуіне жағдай жасау дегеніміз ұлылықтың нышаны деп білемін. Мәселен, соның құрамына енетін қаламыздағы Достық үйі шаңырағының астында он жеті ұлттық-мәдени орталық бар. Әрқайсысы, әрине, өзінің ұлттық салт-дәстүрлерін дәріптеу мүмкіндігіне ие. Барлығының ортақ мақсаты – татулықты, келісімді сақтау, нығайту. Бүгінгі шараны бір атаның баласындай бірге ұйымдастыруымыз осы ынтымақ пен берекеміздің, келісімді сақтау мен нығайту жолындағы жұмысымыздың жемісті екендігінің көрінісі, дәлелі деп білемін. Бұл игілік болашақта да үзілмесін, жалғасын таба берсін. Еліміздегі барлық ұлт өкілдері тату-тәтті болып, Қазақстанның бақуатты, мықты мемлекетке айналуы жолында бірігіп еңбек ете берейік,- деді Алла Ивановна.
Ассамблея жылының басталуына арнал-ған синхрон-акция аясында қаламызда «Менің елім – Мәңгілік Ел» ұранымен көптеген шаралар өткізілді. Солардың бірі – Орталық алаңда ұйымдастырылған флеш-моб. Шараға қалалық ішкі саясат бөлімі мен Достық үйінің қабырғасында жұмыс істейтін ұлттық-мәдени орталықтар және Қазақ инновациялық гуманитарлық-заң университетінің Жастар саясаты орталығы ұйытқы болды. Мерекелік флеш-моб барысында үш жүзден астам қатысушы символикалық «ҚХА-20» деген жазуды құрап сапқа тізіліп, бір мезетте «Бірлік», «Ынтымақ», «Келісім» деген жазулары бар шарларды аспанға ұшырды.
Қазақстан халқы Ассамблеясы жылының басталуына арналған шараға Қазақ инновациялық гуманитарлық-заң университетінің студенттері мен «Семей қаласының жастар орталығы», Қазақстан студенттер альянсы, «Жас Отан» жастар қанаты сияқты жастар ұйымдарының өкілдері қатысты.
Мирас ҚҰСАЙЫН,
«Семей таңы»
