Semeytany.kz — Облыс әкімі Берік Уәли ҚХР Шыңжаң ұйғыр автономиялы өлкесінің Тарбағатай округы партия комитетінің хатшысы, Тачен қаласының мэрі Чжи Сяньвэй бастаған делегациямен кездесті. Тараптар экономикалық және мәдени байланыстарды тереңдету, бірлескен инфрақұрылымдық жобаларды ілгерілету мәселелерін талқылады.
Аймақ басшысы Қазақстан Президенті Қасым-Жомарт Тоқаев пен ҚХР Төрағасы Си Цзиньпин айқындаған стратегиялық бағдар өңірлік деңгейде нақты істермен жалғасып жатқанын атап өтті. Биылғы жеті айдың қорытындысы бойынша Абай облысының тауар айналымы 1,2 млрд АҚШ долларына жетіп, сыртқы сауданың 85 пайызынан асты. Мамыр айында облыс делегациясы Алтай қаласындағы «Үлкен Алтай» субөңірлік ынтымақтастық конференциясына қатысып, жалпы құны 1,5 млрд доллар болатын 15 меморандумға қол қойғаны еске салынды.
Кездесуде «Бақты–Аягөз» теміржол желісінің стратегиялық маңызы жеке аталды. 2025 жылғы 1 қыркүйекте Бейжіңде «Қазақстан темір жолы» ҰК» АҚ Басқарма төрағасы мен China Communications Construction Company президенті жобаның іске асырылуына қатысты нақты міндеттемелерді талқылаған. Берік Уәли бұл бағыт Қазақстан мен Қытай арасындағы көлік-логистикалық ынтымақтастықты күшейтіп, өңірдің транзиттік әлеуетін арттыратынын, сонымен бірге Абай облысы мен Тачен арасындағы сауда байланысын жаңа деңгейге көтеретінін айтты.
Тарбағатай округы тарапынан «Аягөз–Тачен» теміржолын дамыту, Бақты кеден бекетінің өткізу мүмкіндігін кеңейту, Алакөлде қысқы туризмді жолға қою ұсынылды. Делегация құрамындағы отызға жуық ірі компания өкілдері Абай облысына инвестиция құюға дайын екенін мәлімдеді. Чжи Сяньвэй облыс басшылығын Тачен қаласына іссапармен келуге шақырды.
