Semeytany.kz — Абай облысында 2025–2026 жылдардағы жылыту маусымы қарсаңында тұрғын үй секторында алдын алу жұмыстарының бірінші кезеңі басталды. Негізгі назар көпбалалы және аз қамтылған отбасыларға, зейнеткерлер мен мүмкіндігі шектеулі жандардың үйлеріне аударылып отыр. Себебі өрт оқиғаларының басым бөлігі жеке секторда тіркеледі.
Абай облысы ТЖД бастығының орынбасары Алексей Штыкельдің айтуынша, 15 тамыз бен 15 қыркүйек аралығында тәуекел тобындағы отбасылардың тұрғылықты жеріне барып, пештер мен электр желілерінің жай-күйі тексерілуде, ережелер түсіндірілуде.
«Статистикаға сәйкес, ең қауіпті аймақ – тұрғын үй секторы. Өрттердің шамамен 70 пайызы және адам өлімі жағдайларының 90 пайызы осы секторға тиесілі. 2024–2025 жылғы жылыту маусымында облыста 304 өрт тіркелді, бұл алдыңғы кезеңмен (211 жағдай) салыстырғанда 44 пайызға көп. Өрт салдарынан 12 адам зардап шегіп, 9 адам қаза тапты, олардың ішінде екі бала бар. Қайғылы оқиғалардың басты себептері – балаларды қараусыз қалдыру және мас күйінде төсекке жатып шылым шегу», — деді ол.
Өрттен бөлек, жалын шықпай-ақ көмірқышқыл газынан улану деректері көбейді: өткен маусымда 11 адам қаза тапқан, бұл өткен жылмен салыстырғанда 2,7 есе артық. Дегенмен әлеуметтік осал отбасыларға орнатылған датчиктердің тиімділігі дәлелденді: Семей мен Жармада дер кезінде іске қосылған құрылғылардың арқасында төрт адамның, соның ішінде бір баланың өмірі сақталды.
Биыл өңірде осал санаттағы отбасыларға датчик орнату бағдарламасы жалғасып жатыр. 2025 жылы мұндай отбасылар саны 30 пайызға артып, 6 733-ке жетті. Қазіргі таңда олардың барлығы датчиктермен толық қамтамасыз етілген.
Алексей Штыкельдің сөзінше, тұрғын үй секторындағы жағдай ерекше бақылауда. «Өрт пен адам өлімі деректерінің өсуін көріп отырмыз, сондықтан мақсатты профилактикалық жұмыстарды күшейттік. Ең бастысы, көмірқышқыл газының датчиктері шынымен адам өмірін сақтап қалады», — деп түйіндеді ол.
