Semeytany.kz — Семей қаласында қоғамдық қауіпсіздікті күшейту мақсатымен үш стационарлық полиция бекеті ашылды. Аймақ басшысы Берік Уәли Мәңгілік ел көшесіндегі бекеттің жұмысымен танысты.
Облыстық полиция департаменті бастығының орынбасары Ернар Базаровтың мәліметінше, жаңа бекеттер қаладағы халық көп шоғырланатын аумақтарға қойылған. Берік Уәли мұндай нысандардың құқық бұзушылықтардың алдын алудағы тиімділігін атап өтіп, нәтижесі жоғары болса олардың санын арттыруға қолдау көрсетілетінін айтты.
Әр бекеттің аумағы 22 шаршы метр. Нысан толық инженерлік инфрақұрылыммен жабдықталған: жылу, кәріз жүйесі, автономды су көзі бар, қызметкерлердің жайлы жұмысы үшін кондиционер орнатылған. Қауіпсіздік үшін бейнебақылау жүйесі іске қосылған: сыртында 4 IP-камера, ішінде 2 IP-камера және бейнетіркеу құрылғысы жұмыс істейді.
Қазіргі таңда облыс орталығында осындай бес стационарлық бекет бар. Сонымен қатар Семей қалалық әкімдігінің қолдауымен облыстық полиция департаменті екі квадроцикл мен бір электрсамокатпен қамтамасыз етілді.
