Semeytany.kz — Абай облысының әкімі Берік Уәли қаланы аралау кезінде Семейдегі «Дизайн Мебель» кәсіпорнына барып, цехтардың жұмыс барысымен танысты.
Өндіріс орны 1998 жылдан бері корпус және жұмсақ жиһаз шығарады. Кәсіпорын үстел, тумба, шкаф, кеңсе жабдықтары және тұрмыстық-кеңселік жиһаздың өзге де түрлерін дайындайды. Жылдық қуаты – 1320 бұйым, штатында 40 адам еңбек етеді.
Компания өнімдері облыстың білім беру ұйымдары мен мемлекеттік мекемелеріне, сондай-ақ жеке тапсырыс берушілерге жеткізіледі. Жиһаз жасауға Ресей мен Қытайдан әкелінетін сапалы табиғи шикізат пайдаланылады.
Кәсіпорын өңірдің қоғамдық өміріне де белсене атсалысып жүр: Семей қаласының орталық мешітіне және қалалық балалар мен жастар шығармашылық сарайына қолдау көрсеткен, Жаңасемейдегі Ақбұлақ ауылындағы мектепті жөндеп, жиһазбен қамтамасыз еткен.
Аймақ басшысы өндіріс үдерісін және жаңартылған технологиялық желілерді көріп, ұжыммен тілдесті. Оның айтуынша, кәсіпорын өнімдеріне өңірде сұраныс жоғары әрі сапасы бәсекеге қабілетті. Әкімдік тарапынан қажетті қолдау көрсетіліп, мұндай сапалы өндірушілердің мемлекеттік тапсырыстарға кеңінен қатысуына мүмкіндік жасалмақ.
