Semeitany.kz — Облыс әкімі Берік Уәли Семейдегі «УК ЮНИС» тігін фабрикасының жұмысымен танысып, кәсіпорынға өндіріс көлемін ұлғайтып, жаңа нарықтарды игеру жөнінде тапсырма берді.
Аймақ басшысы цехтарды аралап, фабрика жанындағы дүкеннің жұмысына назар аударды. «Бұл – аймақ үшін маңызды өндіріс орны. Мұндай кәсіпорындар жаңа жұмыс орындарын ашуға, отандық өнім көлемін ұлғайтуға мүмкіндік береді. Өңірдегі ірі кәсіпорындар отандық тауарды қолдап, осында тапсырыс беруі қажет. Кәсіпкерлік басқармасына осы бағытта жұмыс істеуді тапсырамын. Өнімдерді қаладағы сауда орындарына шығарып, жұртшылыққа кеңінен насихаттау маңызды. Отандық өнімді жан-жақты қолдауымыз керек. Жергілікті әкімдік тарапынан тиісті қолдау көрсетіледі», – деді Берік Уәли.
«УК ЮНИС» фабрикасы 1993 жылы құрылған. Мұнда 50-ге жуық адам тұрақты жұмыспен қамтылған. Кәсіпорын жылына 300 мыңнан астам бұйым шығарады: шұлық-тоқыма және трикотаж өнімдері, қолғаптар, жұмыс және медициналық киімдер, жемпірлер, жилеттер, бас киімдер, спорттық киімдер, футболкалар, жейделер және басқа да тауарлар. Барлығы – 123 атау. Өнімдері күштік құрылымдарға және ауыр өнеркәсіп кәсіпорындарына жеткізіледі. Компания ассортиментті көбейтуді және трикотаж бағытын дамытуға ниетті.
Қорытындысында аймақ басшысы кәсіпорынға жаңа өткізу арналарына шығу, қала дүкендеріндегі сөре санын арттыру және өңірдегі ірі тапсырыс берушілермен ұзақмерзімді келісімдер жасау бойынша нақты тапсырмалар жүктеді.
