Semeytany.kz — Бүгін аймақ басшысы Берік Уәли қоғамдық ұйымдар мен белсенді азаматтардың ұсыныстарын тыңдау үшін бірқатар өкілдермен кездесті. Қабылдауда «Асыл Мирас» аутизммен ауыратын балаларды қолдау орталығының жетекшісі, облыс әкімінің гендерлік теңдік мәселелері жөніндегі штаттан тыс кеңесшісі Арайлым Әлімжанова, облыстық қоғамдық кеңес мүшесі, Қазақстанның Құрметті құрылысшысы Николай Исаев және Қазақстан журналистер одағының Абай облыстық филиалының төрағасы, Семей қалалық мәслихатының депутаты Хасен Молдабаев болды.
Кездесу барысында Арайлым Әлімжанова жас жұбайларға арналған «Жанұя мектебі» оқу курстарын қолға алуды ұсынды. Жоба Әлихан Бөкейхан университеті ғалымдарының қолдауымен, психологтар мен АХАЖ қызметкерлерінің қатысуымен өтіп, жастарды отбасы өміріне жүйелі түрде дайындауға бағытталмақ. Сонымен қатар ауыл әйелдерін қолдауға қатысты бастамалар айтылды. Облыс әкімі ұсыныстарды құптап, Ішкі саясат басқармасына тұжырымдамасын әзірлеуді тапсырды.
Николай Исаев Семей қаласындағы балалар паркын жаңғырту, тарихи қиылысты абаттандыру және тарихи орындардың картасын әзірлеу жөнінде ұсыныстарын жеткізді. Бұған қоса, қараусыз қалған гараждарды ретке келтіру, Шүлбі кентінде жылыжайлар ашу, Ертіс өзенінде су көлігі қатынасын қалпына келтіру және қала құрылысы жөніндегі кеңесті қайта құру мәселелері көтерілді. Аймақ басшысы бұл бастамалардың өңір игілігіне қызмет етуі қажеттігін атап өтті.
Хасен Молдабаев журналистер одағы филиалының соңғы үш жылдағы жұмысын баяндап, өңірдегі БАҚ қызметін, қоғаммен байланысты және ақпараттық саясатты жетілдіру жолдарын ұсынды.
«Бүгін облыстағы қоғамдық ұйым өкілдерімен, белсенді азаматтармен кездестім. Кездесуде айтылған ұсыныстарды жұмыс барысында назарға алып, тиісті шешімдер қабылдайтын боламыз», – деді Берік Уәли.
