Semeytany.kz – Абай облысының білім басқармасына жаңа басшы тағайындалды. Лауазымға білім саласында көп жылғы тәжірибесі бар Бауыржан Амангелдіұлы Ердембеков келді.
Бауыржан Ердембеков 1974 жылы Семей қаласында дүниеге келген. Семей мемлекеттік университетін «Қазақ тілі мен әдебиеті» мамандығы бойынша, сондай-ақ Қазақ инновациялық гуманитарлық-заң университетін «Мемлекеттік және жергілікті басқару» мамандығы бойынша тәмамдаған.
Еңбек жолын 1991 жылы Жарма ауданы Асқаралы ауылындағы Лекеров атындағы мектепте мұғалім болып бастаған. Кейін М.Әуезов атындағы Семей университетінің сырттай оқыту факультетінің деканы, проректоры болды. Л.Н.Гумилев атындағы Еуразия ұлттық университетінде филология факультетінің қазақ әдебиеті кафедрасын басқарды. С.Аманжолов атындағы Шығыс Қазақстан мемлекеттік университеті ректорының кеңесшісі, Қ.Жұбанов атындағы Ақтөбе өңірлік мемлекеттік университетінің ректоры қызметтерін атқарды. «Шәкәрім атындағы университеті» КеАҚ-тың Басқарма төрағасы–Ректоры болды, «Абай және ұлттық руханият» ғылыми-зерттеу орталығында бас ғылыми қызметкер, соңғы уақытта осы университеттің қазақ филологиясы және журналистика кафедрасының профессоры ретінде еңбек етті.
2025 жылғы 5 қыркүйектен бастап Бауыржан Ердембеков Абай облысы білім басқармасының басшысы лауазымына тағайындалып, қызметіне кірісті.
