Semeytany.kz — Өңірлік коммуникациялар қызметі БАҚ өкілдеріне баспасөз турын өткізіп, ЖЭО-1, Орталық жылу пункті 15/1, «Жігер СТ» ЖШС, «Орталық» қазандығы және Семейдің Сроства ауданындағы су құбыры құрылысының барысын көрсетті. Дайындық жұмыстары 1 қазанға дейін толық аяқталатыны хабарланды.
Абай облысының энергетика және тұрғын үй-коммуналдық шаруашылық басқармасының басшысы Раджан Сейтқановтың айтуынша, өңір 2025–2026 жылдардағы жылыту маусымына толық әзір. «Облыс халқының көмірге жалпы қажеттілігі 567 мың тонна. Көмірді ертерек сатып алу – отбасының жылу қауіпсіздігін қамтамасыз етіп, маусым басталғандағы кезек, жеткізу қиындықтары мен баға өсімінің алдын алады», – деді ол.
Қазір жұмыстар штаттық режимде жүріп жатыр: 3 қала мен 5 аудандағы 23 жылу көзі мен 24 шақырым жылу желісінде құрылыс, жаңғырту және ағымдағы жөндеу іске асуда. Бұл мақсатқа 11,8 млрд теңге қаражат бөлінген.
Қорытындылай айтқанда, негізгі нысандардағы жұмыстар бекітілген жоспарға сай жалғасып, жылыту маусымына дайындық 1 қазанға дейін толық тәмамдалады. Тұрғындар көмір қорын қазірден қамдап қоюы сұралады.
